ନୂଆଦିଲ୍ଲୀ: ମହଙ୍ଗାଇ ରୁ ସାଧାରଣ ଲୋକଙ୍କୁ କିଛି ମାତ୍ରାରେ ଆରାମ ଦେବା ପାଇଁ ସରକାର ବୁଧବାର ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇଛନ୍ତି। ଇନ୍ଧନ ମୂଲ୍ୟ ରେକର୍ଡ ସ୍ତରରେ ପହଂଚିବା ପରେ,କେନ୍ଦ୍ର ପେଟ୍ରୋଲ ଏବଂ ଡିଜେଲ ଉପରେ ଏକ୍ସାଇଜ୍ ଡ୍ୟୁଟି ଯଥାକ୍ରମେ ୫ ଏବଂ ୧୦ ଟଙ୍କା ହ୍ରାସ କରିଛି। ଦିୱାଲୀ ପୂର୍ବରେ କରାଯାଇଥିବା ଏହି ଘୋଷଣା ଆକାଶଛୁଆଁ ଇନ୍ଧନ ମୂଲ୍ୟ ହ୍ରାସ କରିବାରେ ସହାୟକ ହେବ ଏବଂ ମହଙ୍ଗାଇର ଶିକାର ହେଉଥିବା ସାଧାରଣ ଲୋକଙ୍କୁ ମଧ୍ୟ କିଛି ଆରାମ ଦେବ।
ନଭେମ୍ବର ୪ ରୁ ଏକ୍ସାଇଜ୍ ଡ୍ୟୁଟି ହ୍ରାସ ଲାଗୁ ହେବ ଏବଂ ଏହା ସହିତ ଦିଲ୍ଲୀରେ ପେଟ୍ରୋଲର ମୂଲ୍ୟ ବର୍ତ୍ତମାନର ୧୧୦ .୦୪ ରୁ ଲିଟର ପିଛା ୧୦୫ .୦୪ ଟଙ୍କାକୁ ହ୍ରାସ ପାଇବ ଏବଂ ଡିଜେଲର ମୂଲ୍ୟ ୯୮ .୪୨ ରୁ ଲିଟର ପିଛା ୧୦ ଟଙ୍କାକୁ ହ୍ରାସ ପାଇ,ଲିଟର ପିଛା ମୂଲ୍ୟ ୮୮ .୪୨ ହୋଇଛି । ଅର୍ଥ ମନ୍ତ୍ରଣାଳୟ ଏକ ବିବୃତ୍ତିରେ କହିଛି ଯେ ଆଜି(ଗୁରୁବାର) ଠାରୁ ପେଟ୍ରୋଲ ଏବଂ ଡିଜେଲ ଉପରେ କେନ୍ଦ୍ରୀୟ ଏକ୍ସାଇଜ୍ ଡ୍ୟୁଟି ଯଥାକ୍ରମେ ୫ ଏବଂ ୧୦ ଟଙ୍କା ହ୍ରାସ କରିବାକୁ ଭାରତ ସରକାର ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛନ୍ତି। ଏହା ପେଟ୍ରୋଲ ଏବଂ ଡିଜେଲର ମୂଲ୍ୟ ହ୍ରାସ କରିବ |
ଏହା ହେଉଛି ଏକ୍ସାଇଜ୍ ଡ୍ୟୁଟିରେ ସର୍ବାଧିକ ହ୍ରାସ ଏବଂ ଏହା ସହିତ ମାର୍ଚ୍ଚ ୨୦୨୦ ରୁ ମେ ୨୦୨୦ ମଧ୍ୟରେ ପେଟ୍ରୋଲ ଏବଂ ଡିଜେଲ ଉପରେ ଟିକସ ୧୩ ରୁ ୧୬ ଟଙ୍କା ବୃଦ୍ଧି ହେବାର ଏକ ଅଂଶ ପ୍ରତ୍ୟାହାର କରାଯାଇଛି। ତତକ୍ଷଣାତ୍ ଏକ୍ସାଇଜ୍ ଡ୍ୟୁଟିର ବୃଦ୍ଧି ପେଟ୍ରୋଲ ଉପରେ କେନ୍ଦ୍ରୀୟ ଟ୍ୟାକ୍ସକୁ ଲିଟର ପିଛା ୩୨ .୯ ଟଙ୍କା ଏବଂ ଡିଜେଲ ଉପରେ ୩୧ .୮ ଟଙ୍କାକୁ ବୃଦ୍ଧି କରିଥିଲା। ଗ୍ରାହକଙ୍କ ଆଶ୍ବସ୍ତି ପାଇଁ ପେଟ୍ରୋଲ ଏବଂ ଡିଜେଲ ଉପରେ ଭାଟ୍ ହ୍ରାସ କରିବାକୁ ମଧ୍ୟ ରାଜ୍ୟମାନଙ୍କୁ ଅନୁରୋଧ କରାଯାଉଛି ବୋଲି ବିବୃତ୍ତିରେ କୁହାଯାଇଛି।
ଆନ୍ତର୍ଜାତୀୟ ତୈଳ ଦର ରେ କ୍ରମାଗତ ବୃଦ୍ଧି ପରେ ସାରା ଦେଶରେ ଖୁଚୁରା ହାର ରେକର୍ଡ ସର୍ବାଧିକ ହେବା ପରେ ଏକ୍ସାଇଜ୍ ଡ୍ୟୁଟିର ହ୍ରାସ ଘଟିଛି। ସମସ୍ତ ପ୍ରମୁଖ ସହରରେ ପେଟ୍ରୋଲ ଲିଟର ପିଛା ୧୦୦ ରୁ ଅଧିକ ଥିବାବେଳେ ଡିଜେଲ ଅନେକ ରାଜ୍ୟରେ ଏହି ସ୍ତର ଅତିକ୍ରମ କରିଛି। ଇନ୍ଧନ ମୂଲ୍ୟରେ କ୍ରମାଗତ ବୃଦ୍ଧି ବିରୋଧୀ ଦଳ ଦ୍ୱାରା ତୀବ୍ର ସମାଲୋଚନା କରାଯାଇଥିଲା। ବିଶେଷକରି କଂଗ୍ରେସ ସରକାରଙ୍କୁ ସମାଲୋଚନା କରି ଏକ୍ସାଇଜ୍ ଡ୍ୟୁଟି ପ୍ରତ୍ୟାହାର କରିବାକୁ ଦାବି କରିଛି। ଏପ୍ରିଲ-ଅକ୍ଟୋବର ପାଇଁ ଉପଭୋକ୍ତା ତଥ୍ୟକୁ ଆଧାର କରି ଏକ୍ସାଇଜ୍ ଡ୍ୟୁଟିରେ କଟ୍ ସରକାରଙ୍କୁ ମାସିକ ୮ ,୭୦୦ କୋଟି ଟଙ୍କା ରାଜସ୍ୱ ହରାଇବ।
ଶିଳ୍ପ ସୂତ୍ର ଅନୁଯାୟୀ, ଏହାର ପ୍ରଭାବ ବାର୍ଷିକ ୧ ଲକ୍ଷ କୋଟିରୁ ଅଧିକ ହେବ। ଚଳିତ ଆର୍ଥିକ ବର୍ଷର ଅବଶିଷ୍ଟ ସମୟ ପାଇଁ ଏହାର ପ୍ରଭାବ ୪୩ ,୫୦୦ କୋଟି ଟଙ୍କା ହେବ। ମୋଟର ଚାଳକମାନେ ଏକ୍ସାଇଜ୍ ଡ୍ୟୁଟି ହ୍ରାସରୁ ଆରାମ ପାଇବେ | ଟ୍ରକ ଏବଂ ଡିଜେଲକୁ ଅଧିକ ବ୍ୟବହାର କରୁଥିବା କୃଷି କ୍ଷେତ୍ର ପାଇଁ ଏହା ଏକ ବଡ଼ ଆରାମ ହେବ | ବିବୃତ୍ତି ଅନୁଯାୟୀ, କୃଷକମାନେ ସେମାନଙ୍କର କଠିନ ପରିଶ୍ରମ ସହିତ ‘ଲକଡାଉନ୍’ ସମୟରେ ମଧ୍ୟ ଅର୍ଥନୈତିକ ଅଭିବୃଦ୍ଧି ବଜାୟ ରଖିଥିଲେ ଏବଂ ଡିଜେଲ ଉପରେ ଏକ୍ସାଇଜ୍ ଡ୍ୟୁଟିର ହ୍ରାସ ସେମାନଙ୍କୁ ଆଗାମୀ ରବି ଋତୁରେ ସେମାନଙ୍କୁ ଆଶ୍ବସ୍ତି ମିଳିବ ।
ଗତ କିଛି ମାସ ମଧ୍ୟରେ, ବିଶ୍ୱରେ ଅଶୋଧିତ ତୈଳ ମୂଲ୍ୟରେ ବୃଦ୍ଧି ଘଟିଛି। ଏହାଦ୍ୱାରା ଗତ ସପ୍ତାହରେ ପେଟ୍ରୋଲ ଏବଂ ଡିଜେଲର ଘରୋଇ ମୂଲ୍ୟରେ ବୃଦ୍ଧି ଘଟି ମୁଦ୍ରାସ୍ଫୀତି ଚାପ ବୃଦ୍ଧି ପାଇଛି ।
