ବାସ୍ତବ ବ୍ୟୁରୋ-ସାରା ବିଶ୍ୱ ଏବେ କରୋନା ସଙ୍କଟ ସହ ଲଢ଼ୁଛି । ଏହା ମଧ୍ୟରେ ବିଶ୍ବର ବଡ଼ ବଡ଼ ଦେଶଗୁଡ଼ିକ ମଧ୍ୟରେ ଭାରତ ଏହାର ପ୍ରଭାବ ବିସ୍ତାର କରିଥିବା ଦେଖିବାକୁ ମିଳିଛି । ଭାରତ ହାଇଡ୍ରୋକ୍ସିକ୍ଲୋରୋକୁଇନ ଔଷଧ ରପ୍ତାନୀ ଉପରୁ କଟକଣା ହଟାଇଦେବା ପରେ ସବୁ ଦେଶ ଭାରତର ପ୍ରଶଂସା କରିବାରେ ଲାଗିଛନ୍ତି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପରେ ବ୍ରାଜିଲ ରାଷ୍ଟ୍ରପତି ଜୈର ବୋଲସୋନାରୋ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଚିଠି ଲେଖି ଭାରତକୁ ଧନ୍ୟବାଦ ଦେଇଛନ୍ତି। ଭାରତ ଆମକୁ ‘ସଞ୍ଜୀବନି ବୁଟି’ ଦେଇଛି ବୋଲି ସେ କହିଛନ୍ତି।
ଭାରତରେ ଏବେ ହନୁମାନ ଜୟନ୍ତୀ ପାଳନ ପାଇଁ ପ୍ରସ୍ତୁତି ଚାଲିଥିବାବେଳେ ବ୍ରାଜିଲ ରାଷ୍ଟ୍ରପତି ଭାରତର ପଦକ୍ଷେପକୁ ହନୁମାନ ଏବଂ ରାମାୟଣ ସହିତ ତୁଳନା କରିବା ବେଶ୍ ମହତ୍ଵ ସୃଷ୍ଟି କରିଛି। ବୋଲସୋନାରୋ ଚିଠିରେ ରାମାୟଣ କଥା ଉଲ୍ଲେଖ କରିଛନ୍ତି। ସର ବିଦ୍ଧ ଲକ୍ଷ୍ମଣଙ୍କ ଜୀବନ ବଞ୍ଚାଇବା ଲାଗି ହନୁମାନ ସଞ୍ଜୀବନି ଆଣିଥିଲେ। ଏବେ ସଙ୍କଟର ଏହି ଘଡ଼ିସନ୍ଧି ମୁହୂର୍ତ୍ତରେ ଭାରତ ବ୍ରାଜିଲକୁ ଯେଉଁ ସହାୟତା କରିଛି ତାହା ଠିକ୍ ରାମାୟଣରେ ହନୁମାନ ପ୍ରଭୁ ଶ୍ରୀରାମଙ୍କ ଭାଇ ଲକ୍ଷ୍ମଣଙ୍କ ପାଇଁ ସଞ୍ଜୀବନି ବୁଟି ଆଣି ତାଙ୍କ ଜୀବନ ରକ୍ଷା କରିବା କରିବା ଭଳି।
ଆମେରିକା, ବ୍ରାଜିଲ୍ ସମେତ ଅନ୍ୟ ୩୦ରୁ ଅଧିକ ଦେଶରେ କ୍ଲୋରୋକ୍ୱିନ୍ ଟ୍ୟାବଲେଟ୍ର ଚାହିଦା ବୃଦ୍ଧି ପାଇଛି। ଭାରତରୁ କ୍ଲୋରୋକ୍ୱିନ୍ ଟ୍ୟାବଲେଟ୍ ନେବା ପାଇଁ ବିଭିନ୍ନ ଦେଶ ଅନୁରୋଧ କରିଛନ୍ତି। ଏହାକୁ ଦୃଷ୍ଟିରେ ରଖି କ୍ଲୋରୋକ୍ୱିନ୍ ଟ୍ୟାବଲେଟ୍ର ଉତ୍ପାଦନ ବୃଦ୍ଧି ଲାଗି ୨୪ ଘଣ୍ଟିଆ କାମ ଜାରି ରହିଛି। ପ୍ରତିଦିନ ୫୦ ଲକ୍ଷ ହାଇଡ୍ରୋକ୍ସିକ୍ଲୋରୋକ୍ୱିନ୍ ଟ୍ୟାବଲେଟ୍ ପ୍ରସ୍ତୁତ କରାଯାଉଛି। ମାଲେରିଆ ଚିକିତ୍ସା ଲାଗି ବ୍ୟବହୃତ ହେଉଥିବା ହାଇଡ୍ରୋକ୍ସିକ୍ଲୋରୋକ୍ୱିନ୍ ଟ୍ୟାବଲେଟ୍ କରୋନା ଚିକିତ୍ସାରେ ବେଶ୍ ସଫଳ ରହିଥିବା କୁହାଯାଉଛି। ଦେଶର କେତେକ ଔଷଧ କମ୍ପାନୀକୁ ଏହାର ପ୍ରସ୍ତୁତି ପାଇଁ ନିର୍ଦ୍ଦେଶ ଦିଆଯାଇଛି।
