ବାସ୍ତବ ବ୍ୟୁରୋ-ଅଭିନେତା ସୁଶାନ୍ତ ସିଂ ରାଜପୁତଙ୍କ ମୃତ୍ୟୁ ମାମଲାର ସିବିଆଇ ତଦନ୍ତ ପାଇଁ ସୁପ୍ରିମକୋର୍ଟ ଆଜି ନିର୍ଦ୍ଦେଶ ଦେଇଛନ୍ତି । ଏବେ ଯାଏଁ ସଂଗ୍ରହ ହୋଇଥିବା ସମସ୍ତ ପ୍ରମାଣକୁ ସିବିଆଇକୁ ହସ୍ତାନ୍ତର କରିବାକୁ ସୁପ୍ରିମ୍ କୋର୍ଟ ମୁମ୍ବାଇ ପୁଲିସକୁ କହିଛନ୍ତି । ଏଥିସହ ତଦନ୍ତରେ ସହଯୋଗ କରିବାକୁ ମୁମ୍ବାଇ ପୋଲିସକୁ ନିର୍ଦ୍ଦେଶ ଦିଆଯାଇଛି । ସୁପ୍ରିମକୋର୍ଟ ଏହା ମଧ୍ୟ କହିଛନ୍ତି ଯେ ସୁଶାନ୍ତ ସିଂଙ୍କ ପିତାଙ୍କ ଅଭିଯୋଗ ଆଧାରରେ ପାଟନାରେ ପଞ୍ଜୀକୃତ ହୋଇଥିବା ଏଫଆଇଆର ଆଇନଗତ ଅଟେ । ମହାରାଷ୍ଟ୍ର ସରକାର ମଧ୍ୟ ଏହି ନିଷ୍ପତ୍ତିକୁ ଚ୍ୟାଲେଞ୍ଜ କରିପାରନ୍ତି ବୋଲି ଜଣାପଡିଛି ।
ସୁପ୍ରିମକୋର୍ଟର ଏହା ନିଷ୍ପତ୍ତି ପରେ ମହାରାଷ୍ଟ୍ର ସରକାରଙ୍କ ପରାମର୍ଶଦାତା କହିଛନ୍ତି ଯେ, “ଆମେ ଏହି ନିଷ୍ପତ୍ତିକୁ ଚ୍ୟାଲେଞ୍ଜ କରିବୁ । “ଏହା ଉପରେ ସୁପ୍ରିମକୋର୍ଟ ବିଚାରପତି ହୃଷିକେଶ ରାୟ କହିଛନ୍ତି ଯେ, “ଆପଣ ପ୍ରଥମେ ଏହି ଜଜମେଣ୍ଟ କୁ ପଢନ୍ତୁ , ତା’ପରେ ସମୀକ୍ଷା ଆବେଦନ ଦାଖଲ କରିବାକୁ ଚିନ୍ତା କରିବେ । ପ୍ରତ୍ୟେକ ଦିଗକୁ ଅତି ନିକଟରୁ ଅଧ୍ୟୟନ କରିବା ପରେ ଆମେ ଏହି ରାୟ ଦେଇଛୁ ।”
ଏଥି ସହ ସୁଶାନ୍ତ ସିଂଙ୍କ ପିତାଙ୍କ ଓକିଲ କେ.କେ ବିକାଶ ସିଂ କହିଛନ୍ତି ଯେ, “ସୁଶାନ୍ତଙ୍କ ପରିବାର ପାଇଁ ଏହା ଏକ ବଡ଼ ବିଜୟ । ସୁପ୍ରିମକୋର୍ଟ ଏହା ମଧ୍ୟ ସ୍ୱୀକାର କରିଛନ୍ତି ଯେ ମୁମ୍ବାଇ ପୋଲିସ ଏ ସମ୍ପର୍କରେ ସଠିକ୍ ତଦନ୍ତ କରିନାହିଁ । ଏହା ଏକ ଐତିହାସିକ ନିଷ୍ପତ୍ତି । ନ୍ୟାୟ ଦିଗରେ ଏହା ହେଉଛି ପ୍ରଥମ ଏବଂ ବଡ ପଦକ୍ଷେପ । ଏବେ ସିବିଆଇ ଏହାର ତଦନ୍ତ ଆରମ୍ଭ କରିବ ।”
ଦୀର୍ଘ ଦିନରୁ ସୁଶାନ୍ତଙ୍କ ପରିବାର ଏବଂ ତାଙ୍କ ପ୍ରଶଂସକ ସିବିଆଇ ତଦନ୍ତ ଦାବି କରି ଆସୁଥିଲେ । ED ସୁଶାନ୍ତ ସିଂହ ରାଜପୁତଙ୍କ ମାମଲାର ତଦନ୍ତକୁ ନେଇ ମୁମ୍ବାଇରେ ସର୍ଚ୍ଚ ଅପରେସନ କରୁଛି ।
