ବାସ୍ତବବ୍ୟୁରୋ:(ଚାନ୍ଦବାଲି)ଭଦ୍ରକ ଜିଲ୍ଲା ତିହିଡି ତହସିଲ ପୀରହାଟ ପୁରୁଣାବଜାର ପାଢୀସାହି ମୁସଲମାନ ବସ୍ତି ରେ ଘଟିଛି ଏଭଳି ଅଭାବନୀୟ ଘଟଣା। ଆଜି ରୋଷେଇ ଚାଲୁଥିବା ସମୟରେ ଗ୍ୟାସ ଟାଙ୍କି ଫାଟିଥିଲା। ଏଥିରେ ଚାଳ ଛପର ପ୍ରାୟ କୋଡିଏ ଫୁଟ ଉପରକୁ ଉଠି ଯାଇଥିଲା। ଚାହୁ ଚାହୁ ନିମିଷକ ମଧ୍ଯରେ ନିଆଁ ଚାରିଆଡେ ବ୍ୟାପି ଯାଇଥିଲା। ନିଆଁକୁ ଆୟତ୍ତ କରୁଥିବା ବେଳେ ଜଣେ ପୁରୁଷ ଓ ଦୁଇ ଜଣ ମହିଳା ଆହତ ହୋଇଥିବାର ସୂଚନା ମିଳିଛି।
ବର୍ଷା ସତ୍ବେ ନିଆଁର ବେଗ ଥମିବାର ନଥିଲା। ପ୍ୟାରା ସାହାଜୀ, ମୁର୍ସିଦ ସାହାଜୀ, ଝଡିଆ ସାହାଜୀ, ହାକିମୁଦିନ୍ ଖାଁ, କୌଶର ସାହା ଓ ଜୈରା ବିବିଙ୍କର ପ୍ରାୟ ଆଠ ବଖରା ଗୃହ ଭଷ୍ମିଭୁତ ହୋଇ ଯାଇଛି। ଦମକଳ ବାହିନୀ ନିଆଁକୁ ଆୟତ୍ତ କରିଥିଲେ ହେଁ ସବୁ କିଛି ନଷ୍ଟ ହୋଇଯାଇଛି। ପୀରହାଟ ଆରଆଇ ମୀନକେତନ ଦାସ ଘଟଣା ସ୍ଥଳରେ ପହଁଚି ବିପନ୍ନଙ୍କୁ ସମବେଦନା ଜ୍ଞାପନ କରିବା ସହିତ କ୍ଷୟକ୍ଷତିର ଆକଳନ କରିଥିବା ଜଣାଯାଇଛି। ତେବେ ଖଟିଖିଆ , ଗରିବ ଶ୍ରେଣୀର ଏହି ବିପନ୍ନ ପରିବାରକୁ ସମସ୍ତ ପ୍ରକାର ସରକାରୀ ସହାୟତା ଯୋଗାଇ ଦେବାକୁ ସାଧାରଣରେ ଦାବି ହୋଇଛି।
