ବାସ୍ତବବ୍ୟୁରୋ:(ପୁରୀ) ଶ୍ରୀମନ୍ଦିରରେ ଲାଗିବ ରୂପା କବାଟ, ଗତ ରାତିରୁ ଆରମ୍ଭ ହୋଇଛି କାମ । ବେହରଣ ଦ୍ଵାରକୁ କଢା ଯାଇ ମ୍ୟୁଜିଅମରେ ରଖାଯାଇଛି । ସେହି ଦ୍ୱାର ବନ୍ଧରେ ଷ୍ଟିଲ ଫ୍ରେମ ଲଗାଯାଇଥିବା ବେଳେ ସେଥିରେ ବର୍ମାଟିକ କାଠରେ ତିଆରି ଦ୍ଵାରକୁ ଲଗାଯିବ ଏବଂ ଏହା ଉପରେ ରୂପା ଛାଉଣୀ କରାଯିବ । ତେବେ ଏନେଇ ଗତକାଲି ରାତିରେ ଦକ୍ଷିଣ ଦ୍ୱାର ଦେଇ କାଠ କବାଟ ମନ୍ଦିର ଭିତରକୁ ନିଆଯାଇଛି ।
ଦ୍ୱାର ଲଗାଯିବା ପୂର୍ବରୁ ପରୀକ୍ଷା ମୂଳକ ଭାବେ ଏହାକୁ ଷ୍ଟିଲ ଫ୍ରେମରେ କବାଟ ସାଇଜ୍ର ପ୍ଲାଇ ଲଗାଯିବାର ସ୍ଥିର କରାଯାଇଥିବା ବେଳେ, ଦ୍ଵାରକୁ ଖୋଲିବା ଓ ବନ୍ଦ ପ୍ରକ୍ରିୟା ତନଖି କରାଯିବ । ଏହା ଯଦି ଠିକ ଭାବେ କାର୍ଯ୍ୟ କରେ,ପ୍ଲାଇ ଖୋଲାଯାଇ ସ୍ଥାୟୀ ଭାବେ କାଠ କବାଟ ଲଗାଯିବାର ବ୍ୟବସ୍ଥା ହୋଇଛି।ରୂପା ଛାଉଣୀ ପାଇଁ ସ୍ୱତନ୍ତ୍ର ଟିମ ବମ୍ବେରୁ ଆସିଛନ୍ତି । ସେବାୟତ ପ୍ରତିନିଧିଙ୍କୁ ନେଇ ଗଠିତ କମିଟି ଏବଂ ଶ୍ରୀମନ୍ଦିର ବୈଷୟିକ କାର୍ଯ୍ୟନିର୍ବାହୀ ଅଧିକାରୀଙ୍କ ଉପସ୍ଥିତିରେ ଏହି କାର୍ଯ୍ୟ ଜାରି ରହିଛି । ସେପଟେ ଏଏସଆଇ ପକ୍ଷରୁ ଗର୍ଭଗୃହ ଯାଞ୍ଚ ହେଉଥିବା ବେଳେ,ବମ୍ବେର ୬ ଜଣିଆ ସେନ୍ସ ଜିଓମାଟିକ୍ସ ଲିମିଟେଡ୍ର କର୍ମକର୍ତ୍ତା ମାନେ ନାଟମଣ୍ଡପ , ଜଗମୋହନ, ଭୋଗମଣ୍ଡପ ଆଦିର ଲେଜର ସ୍କାନିଂ କରୁଛନ୍ତି ।
