ବାସ୍ତବବ୍ୟୁରୋ:(ନୂଆଦିଲ୍ଲୀ) ଟୋକିଓ ଅଲିମ୍ପିକ୍ସ ପୁରୁଷ ହକିରେ ଭାରତୀୟ ଦଳ ଆଉ ପାଦେ ଆଗରେ । ରିଓ ଅଲିମ୍ପିକ୍ସରେ ସ୍ୱର୍ଣ୍ଣ ପଦକ ଜିତିଥିବା ଆର୍ଜେଣ୍ଟିନାକୁ ୩-୧ ଗୋଲରେ ହରାଇ ବିଜୟର ଉଲ୍ଲାସ ଦେଇଛି ପ୍ରତ୍ୟେକ ଭାରତୀୟଂକୁ । ଏହି ବିଜୟ ସହିତ ଭାରତୀୟ ଦଳ ପୁଲ୍ ‘ଏ’ରେ ୯ ପଏଣ୍ଟ ହାସଲ କରି କ୍ୱାର୍ଟର ଫାଇନାଲ୍ରେ ପହଂଚିଛି ।
ମ୍ୟାଚ୍ର ପ୍ରଥମାର୍ଦ୍ଧରେ କେହି କାହାକୁ ଗୋଲ ଦେଇ ପାରି ନଥିବା ବେଳେ, ଖେଳର ୪୩ତମ ମିନିଟ୍ରେ ଭାରତ ପକ୍ଷରୁ ପ୍ରଥମ ଗୋଲ ଦେଇଥିଲେ ବରୁଣ କୁମାର। ଏହାର ଉତ୍ତରରେ ଖେଳର ୪୮ ମିନିଟ୍ରେ ଆର୍ଜେଣ୍ଟିନାର ମେଇକୋ କେସେଲା ଗୋଟିଏ ଗୋଲ ଦେଇ ସ୍ଥିତିକୁ ବରାବର ସ୍ତିତିକୁ ଆଣିଥିଲେ । ହେଲେ ଖେଳର ୫୮ ମିନିଟ୍ରେ ବିବେକ ସାଗର ପ୍ରସାଦ ଗୋଟିଏ ଗୋଲ୍ କରିଥିଲେ। ଏହା ପରେ ପରେ ହରମନପ୍ରୀତ୍ ଆଉ ଗୋଟିଏ ଗୋଲ୍ ଦେଇଥିଲେ।
ଟୋକିଓ ଅଲିମ୍ପିକ୍ସରେ ଏହା ଭାରତର ଚତୁର୍ଥ ମ୍ୟାଚ୍ ଥିଲା। ଚାରୋଟି ମ୍ୟାଚ୍ରୁ ଦଳ ୩ଟିରେ ବିଜୟ ହାସଲ କରିଛି। ପ୍ରଥମ ମ୍ୟାଚ୍ରେ ଦଳ ନ୍ୟୁଜିଲ୍ୟାଣ୍ଡକୁ ୩-୨ ଗୋଲରେ ହରାଇଥିଲା। ତେବେ ଦ୍ୱିତୀୟ ମ୍ୟାଚ୍ରେ ଦଳ ଅଷ୍ଟ୍ରେଲିଆ ଠାରୁ ୭-୧ରେ ପରାସ୍ତ ହୋଇଥିଲା। କିନ୍ତୁ ତୃତୀୟ ମ୍ୟାଚ୍ରେ ଦଳ ଜବରଦସ୍ତ ପ୍ରତ୍ୟାବର୍ତ୍ତନ କରିଥିଲା। ଦଳ ୩-୦ ଗୋଲ୍ରେ ସ୍ପେନ୍କୁ ହରାଇଥିଲା। ଆଉ ଏହି ଆତ୍ମବିଶ୍ୱାସକୁ ବଜାୟ ରଖି ଆଜି ଦଳ ତା’ର ଚତୁର୍ଥ ମ୍ୟାଚ୍ରେ ଆର୍ଜେଣ୍ଟିନାକୁ ହରାଇ କ୍ୱାର୍ଟର ଫାଇନାଲ୍ରେ ପଦାର୍ପଣ କରିଛି ।ଦଳର ଏହି ଚମକପ୍ରଦ ଖେଳ ପ୍ରଦର୍ଶନରେ ଟିମ ପ୍ରତି ବଧାଇର ସୁଅ ଛୁଟିଛି ।
