ତ୍ରିନାଥ ବାରିକ(ପୁରୀ):୧୫।୨-ବ୍ରାଉନସୁଗାର ମାଫିଆଙ୍କ ଦିନକୁଦିନ ପାଦୁର୍ଭାବ ବଢ଼ିବାରେ ଲାଗିଛି ।ଗତ ରାତିରେ ବ୍ରାଉନ ସୁଗାର ମାଫିଆ ଫିରୋଜ ଖାନ ସହ ୪ ଜଣକୁ ଗିରଫ କରିଛି ପୁରୀ ପୋଲିସ । ପୁରୀ ବାସେଳୀ ସାହି ଥାନା ପୋଲିସ ଓ ଏସଟିଏଫର ମିଳିତ ଚଢାଉରେ ଜବତ ହେଲା ୩୫୯ ଗ୍ରାମ ବ୍ରାଉନସୁଗାର ଯାହାର ମୂଲ୍ୟ ପ୍ରାୟ ୩୬ ଲକ୍ଷ ଟଙ୍କା ହେବବୋଲି କୁହାଯାଇଛି । ଏଥିସହ ସହ ନଗଦ ୧୭ ହଜାର ଟଙ୍କା,୩ଟି ମୋଟର ସାଇକେଲ, ୫ଟି ମୋବାଇଲ ବାସେଳୀ ସାହି ଥାନା ପୋଲିସ ଜବତ କରିଛନ୍ତି । ଏହି ବ୍ରାଉନସୁଗାର ମାଫିଆ ମାନେ ହେଲେ କଟକ ଦୁର୍ଗା ବଜାର ଅଞ୍ଚଳର ଫିରୋଜ ଖାନ୍, ପିପିଲି ଦେବୀ ଗଳିର ପପୁ ପାଣ୍ଡେ,ଜଟଣୀ ତିରମାଲର ରଞ୍ଜନ ଭୁଜବଳ, ଜଳେଶ୍ବରର ଇଫତେଖାର ତୁଲା।
ଗତ(ସୋମବାର)ରାତିରେ ବ୍ରାଉନସୁଗାର ବିକ୍ରି କରିବା ପାଇଁ ମାଫିଆ ଫିରୋଜ ଖାନ୍ ସହ ଏହି ତିନି ଅଭିଯୁକ୍ତ ପୁରୀ ଆସୁଥିଲେ । ଏହି ସମୟରେ ମାଟିତୋଟା ପଡିଆଠାରେ ବାସେଳୀ ସାହି ଥାନା ପୋଲିସ ଓ ଏସଟିଏଫ ଚଢାଉ କରି ଏମାନଙ୍କୁ ଗିରଫ କରିଛି। ମଙ୍ଗଳବାର ଏନେଇ ଏକ ସାମ୍ବାଦିକ ସମ୍ମିଳନୀରେ, ବାସେଳୀ ସାହି ଥାନାରେ ପୁରୀ ଏସପି କନୱର ବିଶାଳ ସିଂ ଏହି ସୂଚନା ଦେଇଛନ୍ତି।
