ବାସ୍ତବ ବ୍ୟୁରୋ : ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କର ‘ମନ୍ କୀ ବାତ୍’ର ୯୪ତମ ସଂସ୍କରଣ କାର୍ଯ୍ୟକ୍ରମରେ ଦେଶବାସୀଙ୍କୁ ଉଦବୋଧନ ଦେଇ ଛଟ୍ ପୂଜାର ଶୁଭେଚ୍ଛା ଜଣାଇଛନ୍ତି । ପ୍ରଧାନମନ୍ତ୍ରୀ କହିଛନ୍ତି, “ଦେଶର ଅନେକ ସ୍ଥାନରେ ସୂର୍ଯ୍ୟ ପୂଜାର ମହାନ ପର୍ବ ପାଳନ କରାଯାଉଛି । ମୁଁ ପ୍ରାର୍ଥନା କରୁଛି ସୂର୍ଯ୍ୟ ଦେବ ସମସ୍ତଙ୍କୁ କଲ୍ୟାଣ ଓ ଆଶୀର୍ବାଦ କରନ୍ତୁ ।“
ଏହି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓଡିଶାର କୁନି ଦେହୁରୀ ଓ ଭୁବନେଶ୍ୱର ଆଇଆଇଟିର ପଦକ୍ଷେପକୁ ପ୍ରଶଂସା କରିଛନ୍ତି। ଦେଶବାସୀଙ୍କୁ ସମ୍ବୋଧିତ କରି ପ୍ରଧାନମନ୍ତ୍ରୀ ସୌର ଶକ୍ତି ଉପଯୋଗର କଥା କହିଛନ୍ତି । ସୌର ଶକ୍ତିରୁ ଭାରତ ବିଦ୍ୟୁତ୍ ଉତ୍ପାନ କରୁଛି । ସେହିପରି ଚଳିତ ମାସରେ ୨୩ଟି ‘ଆଇଆଇଟି’ ସେମାନଙ୍କର ‘ରିସର୍ଚ ପ୍ରୋଜେକ୍ଟ୍’ ପ୍ରଦର୍ଶନ କରିବାକୁ ଆସିଥିଲେ। ନବଜାତକ ବା କୋଳଛୁଆଙ୍କ ପାଇଁ ଆଇଆଇଟି-ଭୁବନେଶ୍ୱର ଟିମ୍ ଗୋଟାଏ ପୋର୍ଟେବ୍ଲ୍ ଭେଣ୍ଟିଲେଟର୍ ନିର୍ମାଣ କରିଛି। ଏହି ଭେଣ୍ଟିଲେଟର୍ ବ୍ୟାଟେରି ବଳରେ ଚାଲିପାରିବ। ଦୂରଦୂାନ୍ତର ଅଞ୍ଚଳରେ ଅପରିପକ୍ୱ ନବଜାତକମାନଙ୍କ ଜୀବନ ରକ୍ଷା କ୍ଷେତ୍ରରେ ଏହାକୁ ବ୍ୟବହାର କରିହେବ ।
ଏହା ବ୍ୟତୀତ ଓଡ଼ିଶାର କେନ୍ଦୁଝର କର୍ଦ୍ଦାପାଳ ଗାଁର କୁନି ଦେହୁରୀଙ୍କୁ ନେଇ ରୋଜଗାରର ନୂଆ ଉଦାହରଣ ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । କୁନି ଦେହୁରୀ ବର୍ତ୍ତମାନ ସୌର ଶକ୍ତି ସହାୟତାରେ ନିଜେ ରୋଜଗାର କରିବା ସହ ଅନ୍ୟମାନଙ୍କ ପାଇଁ ଉଦାହରଣ ସାଜିଛନ୍ତି। । ସୌର ଶକ୍ତି ଜରିଆରେ ରୋଲିଂ ମେସିନ୍ ଚଳାଇ ସୂତା ଉତ୍ପାଦନ କରୁଛନ୍ତି । ସେ ଏଥିସହ ଆଦିବାସୀମାନଙ୍କୁ ସିଲ୍କ ପ୍ରସ୍ତୁତି ପାଇଁ ତାଲିମ ଦେଇ ରୋଜଗାରକ୍ଷମ କରାଉଛନ୍ତି।
