ବାସ୍ତବ ବ୍ୟୁରୋ : ପଦ୍ମପୁର ରେ ଆଜି (ଶନିବାର) ପ୍ରଚାରର ଶେଷ ଦିନ । ପ୍ରଚାରରେ କମ୍ପୁଛି ପଦ୍ମପୁର । ଝାରବନ୍ଧରେ ଜୋରଦାର ପ୍ରଚାର କରୁଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।
ଗତକାଲି ମୁଖ୍ୟମନ୍ତ୍ରୀ ପ୍ରଚାରରେ ଆସି ଯାହା କହିଥିଲେ ତା’ର କଡା ଜବାବ ରଖିବା ସହ ପ୍ରଦୀପ ପୁରୋହିତଙ୍କ ପାଇଁ ଭୋଟ ଭିକ୍ଷା କରିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ।
ବିଶାଳ ଜନସଭାକୁ ସମ୍ବୋଧନ କରିବା ସମୟରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ କଡା କଟାକ୍ଷ କରି କେନ୍ଦ୍ରମନ୍ତ୍ରୀ ପ୍ରଧାନ କହିଛନ୍ତି, ‘ମୁଖ୍ୟମନ୍ତ୍ରୀ ତ ଗତ ୨ ବର୍ଷ ହେବ ବିଧାନସଭାରୁ ଛୁଟିନେଇ ବସିଥିଲେ । ହେଲେ ପଦ୍ମପୁରକୁ ପ୍ରଚାର କରିବାକୁ ଆସିଲେ କେମିତି? ପ୍ରକୃତରେ ଏହା ଭାରତୀୟ ଜନତା ପାର୍ଟିର ପଦ୍ମପୁରର ନୈତିକ ବିଜୟ ହେଲା, ଆପଣଙ୍କୁ ପଦ୍ମପୁର ପ୍ରଜାତନ୍ତ୍ର ଦରବାରକୁ ଆସିବାକୁ ପଡିଲା, ନତମସ୍ତକ ହେବାକୁ ପଡିଲା । ଏହା ଭାରତର ଗଣତନ୍ତ୍ରର ବିଜୟ ।’
ଧର୍ମେନ୍ଦ୍ର ପ୍ରଧାନ ଆହୁରି ମଧ୍ୟ କହିଛନ୍ତି, ‘ଗତକାଲି ମୁଖ୍ୟମନ୍ତ୍ରୀ ଆସି ପଦ୍ମପୁରବାସୀଙ୍କ ଅନେକ ବିକାଶମୂଳକ କାର୍ଯ୍ୟ କରିବାକୁ କହିଦେଇ ଗଲେ । ହେଲେ ୨୨ ବର୍ଷ ଭିତରେ ପଦ୍ମପୁର ବାସୀଙ୍କ ପାଇଁ କରୁଥିଲେ କ’ଣ? ୨୦୧୯ ମସିହାରେ ପ୍ରଦୀପ ପୁରୋହିତ୍ ବିଧାୟକ ଥିବାବେଳେ ମୁଖ୍ୟମନ୍ତ୍ରୀଙ୍କ ପାଖକୁ ଜିଲ୍ଲା ଦାବି ନେଇ ଯାଇଥିଲେ । ସେତେବେଳେ ଏହି ପ୍ରସଙ୍ଗକୁ ଏଡାଇ ଦେଇଥିଲେ ମୁଖ୍ୟମନ୍ତ୍ରୀ । ଏହାପୂର୍ବରୁ ୧୯୯୩ ମସିହାରେ ଯେତେବେଳେ ପଦ୍ମପୁରକୁ ଜିଲ୍ଲା ଦାବି ହୋଇଥିଲା ସେତେବେଳେ ମଧ୍ୟ ଏହାକୁ ଯେଉଁମାନେ ବିରୋଧ କରିଥିଲେ ସେମାନେ ଏବେ ମୁଖ୍ୟମନ୍ତ୍ରୀଙ୍କ ଡାହାଣ ବାମ ପଟେ ଛିଡା ହୋଇଛନ୍ତି । ଖାଲି ଏତିକି ନୁହେଁ ଝାରବନ୍ଧରେ ଜଳସେଚନ ପ୍ରକଳ୍ପ କରିବାକୁ ପ୍ରତିଶୃତି ଦେଇଥିଲେ ବି ଏହାକୁ ଭୁଲିଗଲେ । ଏବେ ନିର୍ବାଚନ ଆସିବାରୁ ମୁଖ୍ୟମନ୍ତ୍ରୀଙ୍କର ସବୁକଥା ମନେପଡୁଛି’ ।
