ବାସ୍ତବ ବ୍ୟୁରୋ: ବିଶ୍ୱ ସ୍ୱାସ୍ଥ୍ୟ ସଂଗଠନ(ଡବ୍ଲୁଏଚଓ) ଭୁଲ ତଥ୍ୟ ଦେଇଥିବାରୁ, ଏ ସଂପର୍କରେ ବିଭିନ୍ନ ମହଲରୁ ଆପତ୍ତି ଉଠିବା ପରେ ସଂଗଠନ ନିଜର ଭୁଲ ସ୍ୱୀକାର କରିଛି । ଭାରତରେ ଗୋଷ୍ଠୀ ସଂକ୍ରମଣ ହୋଇଥିବା ନିଜର କରୋନା ସ୍ଥିତି ରିପୋର୍ଟରେ ଦର୍ଶାଇଥିଲା । ଏପରିକି ଚୀନରେ କ୍ଲଷ୍ଟର ସଂକ୍ରମଣ କଥା କୁହାଯାଇଥିଲା ।ଗୋଷ୍ଠୀ ସଂକ୍ରମଣ ସ୍ଥାନରେ କ୍ଲଷ୍ଟର ସଂକ୍ରମଣ ବୋଲି ଦର୍ଶାଯାଇଛି । ଆଜି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟର ଯୁଗ୍ମ ସଚିବ ଲବ ଅଗ୍ରଓ୍ୱାଲ କହିଛନ୍ତି ଯେ ଦେଶରେ ଏପର୍ଯ୍ୟନ୍ତ ଗୋଷ୍ଠୀ ସଂକ୍ରମଣ ହୋଇନାହିଁ । ଏପରି ସ୍ଥିତି ଉପୁଜିଲେ ସେ ସଂପର୍କରେ ସୂଚନା ଦିଆଯିବ ।
ତେବେ ଲୋକମାନେ ସତର୍କ ରହିବା ଓ ଭୟଭୀତ ନ ହେବାକୁ ସେ କହିଛନ୍ତି। ନୂଆଦିଲ୍ଲୀରେ ଏକ ସାମ୍ବାଦିକ ସମ୍ମିଳନୀରେ ଅଗ୍ରୱାଲ କହିଛନ୍ତି, ଦେଶରେ ସଂକ୍ରମଣ ଜନିତ ମୃତ୍ୟୁ ସଂଖ୍ୟା ୨୦୬ରେ ପହଞ୍ଚିଛି। ୫୧୬ ଜଣ ସଂକ୍ରମିତ ବ୍ୟକ୍ତି ସମ୍ପୂର୍ଣ୍ଣ ସୁସ୍ଥ ହେବା ପରେ ସେମାନଙ୍କୁ ହସ୍ପିଟାଲରୁ ଛାଡ଼ି ଦିଆଯାଇଛି।
ସେ କହିଛନ୍ତି, ୧କୋଟି ହାଇଡ୍ରୋକ୍ସି କ୍ଲୋରୋକୁଇନ୍ ବଟିକାର ଆବଶ୍ୟକତା ରହିଛି ଓ ଦେଶରେ ବର୍ତ୍ତମାନ ୩କୋଟି ୨୮ଲକ୍ଷ ବଟିକା ମହଜୁଦ ଅଛି। ସେ କହିଛନ୍ତି, ଗତକାଲି ୧୬ହଜାର ନମୁନାର ପରୀକ୍ଷା କରାଯାଇଛି ଓ ସେଥିମଧ୍ୟରୁ ଶତକଡ଼ା ଶୂନ୍ ଦଶମିକ୍ ୨ ଭାଗ ନମୁନା ଭୂତାଣୁରେ ସଂକ୍ରମିତ ହୋଇଥିବାର ଜଣାପଡ଼ିଛି। ସେ କହିଛନ୍ତି, ନମୁନା ସଂଗ୍ରହକୁ ଦେଖିଲେ ସଂକ୍ରମଣ ହାର ଏତେ ଅଧିକ ନୁହେଁ। ଭୂତାଣୁ ସଂକ୍ରମଣର ମୁକାବିଲା ପାଇଁ ଭାରତ ସରକାର ୧୫ହଜାର କୋଟି ଇଣ୍ଡିଆ କୋଭିଡ୍-୧୯ ଜରୁରିକାଳୀନ ସହାୟତା ଓ ସ୍ୱାସ୍ଥ୍ୟ ସୁବିଧା ପ୍ରସ୍ତୁତି ପ୍ୟାକେଜ୍କୁ ଅନୁମୋଦନ କରିଛନ୍ତି।
