ନିରଞ୍ଜନ ବସ୍ତିଆ (ନିଶ୍ଚିନ୍ତକୋଇଲି) : ନିଶ୍ଚିନ୍ତକୋଇଲି ଥାନା ଅଧିନସ୍ଥ ବୁହାଳୋ ପପଞ୍ଚାୟତ ବରପଡା ଗ୍ରାମର ମାଧବ ବେହେରାଙ୍କ ପୁତ୍ର ମହେନ୍ଦ୍ର ବେହେରା (୩୩) ନିଜ ଘରେ ପଙ୍ଖାରେ ବେକରେ ରଶି ଲଗାଇ ଆତ୍ମହତ୍ୟା କରିଥିବା ଜଣାଯାଇଛି । ରାତିରେ ଖାଇ ପିଇ ସାରିବା ପରେ ଶୋଇବା ପୂର୍ବରୁ ମହେନ୍ଦ୍ର ବେକରେ ଲୁଗା ଲଗାଇ ପଙ୍ଖାରେ ଝୁଲୁଥିବାର ପରିବାର ଲୋକେ ଦେଖିଥିଲେ । ସଙ୍ଗେ ସଙ୍ଗେ ତାଙ୍କୁ ଚିକିତ୍ସା ନିମନ୍ତେ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ଅଣାଯାଇଥିଲେ ମଧ୍ୟ ଡାକ୍ତର ସେଠାରେ ତାଙ୍କୁ ମୃତ୍ୟୁ ଘୋଷଣା କରିଥିଲେ ।
ପୋଲିସ ଖବର ପାଇ ଶବକୁ ଜବତ କରି ଏକ ଅପମୃତ୍ୟୁ ମାମଲା ରୁଜୁ କରି ବ୍ୟବଚ୍ଛେଦ ପାଇଁ କଟକ ବଡ ମେଡିକାଲକୁ ପଠାଇଥିଲେ । ଶୋକାକୂଳ ପରିବେଶରେ ଗ୍ରାମ ଶ୍ମଶାନରେ ମହେନ୍ଦ୍ରଙ୍କ ଅନ୍ତୋଷ୍ଟିକ୍ରିୟା ସଂପନ୍ନ ହୋଇଛି । ଏଠାରେ ସୂଚନାଯୋଗ୍ୟ ମହେନ୍ଦ୍ର ସୁଦୁର ଦୁବାଇରେ ରହି କାର୍ଯ୍ୟକରୁଥିଲା ବେଳେ ଗତ ୧୫ ଦିନ ହେବ ତାଙ୍କର ଏକପୁତ୍ର ସନ୍ତାନ ହୋଇଥିବାରୁ ସେ ଘରକୁ ଆସିଥିଲେ । ଗତ ୬ ମାସ ତଳେ ମଧ୍ୟ ସୁଦୁର ଦୁବାଇରେ ତାଙ୍କର ବଡ ଭାଇ ଆତ୍ମହତ୍ୟା କରିଥିଲେ । ପରିବାରରେ ଏଭଳି ଘଟଣାରେ ସ୍ଥାନୀୟ ଅଂଚଳର ଲୋକମାନେ ମର୍ମାହତ ହୋଇଛନ୍ତି ।
