ବାସ୍ତବ ବ୍ୟୁରୋ: ଗୁଜରାଟରେ ତାଣ୍ଡବ ରଚିଲା ‘ବିପର୍ଯ୍ୟୟ’ । ଗୁଜରାଟ ରାଜ୍ୟର କଚ୍ଛ ଏବଂ ସୌରାଷ୍ଟ୍ର ଅଞ୍ଚଳରେ ପ୍ରବଳ ପବନ ଓ ପ୍ରବଳ ବର୍ଷା ଯୋଗୁଁ ବ୍ୟାପକ କ୍ଷୟକ୍ଷତି ହୋଇଛି । ଯେଉଁ ଆଶଙ୍କା କରାଯାଉଥିଲା ତାଠୁ ଅଧିକ କ୍ଷୟକ୍ଷତି ହେଇଛି । ବାତ୍ୟା ସ୍ଥଳଭାଗ ଛୁଇଁବା ପରେ ମାଣ୍ଡଭି, ରାଜକୋଟ, କଚ୍ଚ, ଦ୍ୱାରାକ, ଜାମନଗର, ପୋରବନ୍ଦର ସବୁଠୁ ଅଧିକ ପ୍ରଭାବିତ ହୋଇଛି ।
ବାତ୍ୟାରେ ଶତାଧିକ ବିଦ୍ୟୁତ ଖୁଣ୍ଟ କ୍ଷତିଗ୍ରସ୍ତ ହୋଇଥିବା ବେଳେ ୧୦୦୦ରୁ ଅଧିକ ଗାଁରେ ବିଜୁଳି ସଂଯୋଗ ନାହିଁ। ଯାନବାହନ ଗୁଡିକ ରାସ୍ତାରେ ପଡି ରହିଛି । କଚ୍ଛରେ ମଧ୍ୟ ଦେଖିବାକୁ ମିଳିଛି ବାତ୍ୟାର ତାଣ୍ଡବ । ଘରଦ୍ୱାର ଭାଙ୍ଗିବା ସହ ବଡ ବଡ ଗଛ ଉପୁଡିପଡିଛି । ଏବେ ବି ଜାରି ରହିଛି ବର୍ଷା ପବନ । ଏହାର ପ୍ରଭାବରେ ବିଭିନ୍ନ ସ୍ଥାନରେ କୁତ୍ରିମ ବନ୍ୟା ଦେଖାଦେଇଛି । ରାସ୍ତାରେ ଭାଙ୍ଗିପଡିଥିବା ବିଶାଳ ଗଛଗୁଡିକୁ ସଫା କରାଯାଉଛି ।
ଜଣେ ବରିଷ୍ଠ ଅଧିକାରୀ କହିଛନ୍ତି ଯେ ବାତ୍ୟା ଯୋଗୁଁ ରାଜ୍ୟରେ କେହି ମୃତାହତ ହୋଇନାହାନ୍ତି, ଯାହା କି ସବୁଠାରୁ ବଡ଼ ସଫଳତା। ତେବେ ସୂଚନା ଅନୁସାରେ ବାତ୍ୟା ଯୋଗୁଁ ୨୩ ଜଣ ଲୋକ ଆହତ ହୋଇଛନ୍ତି । କିନ୍ତୁ ବିଭିନ୍ନ ସ୍ଥାନରେ ବ୍ୟାପକ କ୍ଷୟକ୍ଷତି ହୋଇଛି । ଶହ ଶହ ଘର ଭାଙ୍ଗିଯାଇଛି ।ଏନଡିଆରଏଫ ଉଦ୍ଦାରକାର୍ଯ୍ୟରେ ନିୟୋଜିତ ଅଛନ୍ତି ।
ବାତ୍ୟା ଯୋଗୁଁ ଟ୍ରେନ୍ ସେବା ମଧ୍ୟ ପ୍ରଭାବିତ ହୋଇଛି । ପଶ୍ଚିମ ରେଳବାଇ ପକ୍ଷରୁ କୁହାଯାଇଛି ଯେ, ୯୯ଟି ଟ୍ରେନର ଚଳାଚଳ ସାମୟିକ ଭାବେ ରଦ୍ଦ କରାଯାଇଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ମୁଖ୍ୟମନ୍ତ୍ରୀ ଭୂପେନ୍ଦ୍ର ପଟେଲଙ୍କ ସହ ଲଗାତର ଫୋନ ଯୋଗେ ବାତ୍ୟା ପରର ସ୍ଥିତି ବାବଦରେ ଖବର ନେଉଥିବା ଜଣାପଡିଛି ।
