ଭୁବନେଶ୍ୱର(ତ୍ରିଭୁବନ ମହାପାତ୍ର):୧୨/୧୦-ଆର୍ଯ୍ୟ ସମାଜର ପ୍ରତିଷ୍ଠାତା ମହର୍ଷି ଦୟାନନ୍ଦ ସରସ୍ୱତୀଙ୍କ ଦ୍ୱିଶତତ ଜୟନ୍ତୀ ସମାରୋହ ଏବଂ ଆର୍ଯ୍ୟ ସମାଜର ୧୫୦ ବର୍ଷ ଶ୍ରାଦ୍ଧଶତାବ୍ଦୀ ସମାରୋହ ଆଜି ଭୁବନେଶ୍ୱର ସ୍ଥିତ ରେଳ ଅଡିଟୋରିୟମ ଠାରେ ଅତ୍ୟନ୍ତ ବର୍ଣ୍ଣାଢ୍ୟ ପରିବେଶରେ ଅନୁଷ୍ଠିତ ହୋଇଯାଇଛି।
ଉତ୍କଳ ଆର୍ଯ୍ୟ ପ୍ରତିନିଧି ସଭା ଦ୍ୱାରା ଆୟୋଜିତ ଏହି ‘ଓଡ଼ିଶା ଆର୍ଯ୍ୟ ମହା ସମ୍ମେଳନ ୨୦୨୫’ ଅବସରରେ ସମାଜରେ ବୈଦିକ ମୂଲ୍ୟବୋଧର ପ୍ରଚାର ପ୍ରସାର କରୁଥିବା ଆର୍ଯ୍ୟସମାଜ ତରଫରୁ ଏକ ବିଶାଳ ଧର୍ମୀୟ ସମାବେଶ ଅତ୍ୟନ୍ତ ଆନନ୍ଦ ଓ ଉଲ୍ଲାସର ସହିତ ପାଳନ କରାଯାଇଥିଲା।ସମାରୋହର ଉଦ୍ଦେଶ୍ୟ ଓ ମୁଖ୍ୟ ଅତିଥି ସମାରୋହର ପ୍ରାରମ୍ଭରେ ଉତ୍କଳ ଆର୍ଯ୍ୟ ପ୍ରତିନିଧି ସଭାର ଓଡ଼ିଶା ସଭାପତି ସ୍ୱାମୀ ବ୍ରତାନନ୍ଦ ସରସ୍ୱତୀଙ୍କ ଦ୍ୱାରା ଆର୍ଯ୍ୟସମାଜର ପତାକା ଉତ୍ତୋଳନ ପରେ ଯଜ୍ଞ କାର୍ଯ୍ୟକ୍ରମ ସମାପନ କରାଯାଇଥିଲା।
ଆଜିର ମୁଖ୍ୟ ଅତିଥିମାନଙ୍କ ମଧ୍ୟରେ ଓଡ଼ିଶାର ବରଣ୍ୟ ମୁଖ୍ୟମନ୍ତ୍ରୀ ଶ୍ରୀଯୁକ୍ତ ମୋହନ ଚରଣ ମାଝୀ, ସ୍ୱାମୀ ଯୋଗେନ୍ଦ୍ର ଖଚର, ସ୍ୱାମୀ ସୁଧାନନ୍ଦ ସରସ୍ୱତୀ, ସାଧୁ ଜଗଦୀଶ ଭାଇ, ଏବଂ ଉତ୍କଳ ଆର୍ଯ୍ୟ ପ୍ରତିନିଧି ସଭାର ସଭାପତି ସ୍ୱାମୀ ବ୍ରତାନନ୍ଦ ସରସ୍ୱତୀ ପ୍ରମୁଖ ଉପସ୍ଥିତ ଥିଲେ। ଉପସଭାପତି ଶ୍ରୀ ବୀରେନ୍ଦ୍ର କୁମାର ପଣ୍ଡା ଏବଂ ସଚିବ ଶ୍ରୀ ଦୁଷ୍ମନ୍ତ କିଶୋର ସ୍ୱାଇଁଙ୍କ ତତ୍ତ୍ୱାବଧାନରେ ପ୍ରଦୀପ ପ୍ରଜ୍ୱଳନ ପୂର୍ବକ ଏହି ଉତ୍ସବ ଆୟୋଜିତ ହୋଇଥିଲା।
ପୁସ୍ତକ ଉନ୍ମୋଚନ ଓ ସମ୍ବର୍ଦ୍ଧନା କାର୍ଯ୍ୟକ୍ରମ ମୁଖ୍ୟ ଅତିଥି ଶ୍ରୀ ମାଝୀଙ୍କ ଦ୍ୱାରା ଏହି ଅବସରରେ ‘ଆର୍ଯ୍ୟବାର୍ତ୍ତା’ ପୁସ୍ତକ ଉନ୍ମୋଚନ କରାଯାଇଥିଲା। ନିଜ ଭାଷଣରେ ଶ୍ରୀ ମାଝୀ ଆର୍ଯ୍ୟ ସମାଜର ଆଦର୍ଶ, ନିଷ୍ଠା ଓ ନୈତିକତାର ଗୁଣଗାନ କରିବା ସଙ୍ଗେ ସଙ୍ଗେ ସମାଜ ଗଠନ ପାଇଁ ପ୍ରେରଣା ଦେଇଥିଲେ।
ଏହା ପରେ ଏକ ବିଶେଷ ସମ୍ବର୍ଦ୍ଧନା କାର୍ଯ୍ୟକ୍ରମର ଆୟୋଜନ କରାଯାଇଥିଲା। ଉତ୍କଳ ଆର୍ଯ୍ୟ ପ୍ରତିନିଧି ସଭାର ସଭାପତି ସ୍ୱାମୀ ବ୍ରତାନନ୍ଦ ସରସ୍ୱତୀଙ୍କ ଉପସ୍ଥିତିରେ ଉତ୍ସବରେ ଅଂଶଗ୍ରହଣ କରିଥିବା ସମ୍ମାନୀୟ ବ୍ୟକ୍ତିବିଶେଷ, ପ୍ରଶଂସନୀୟ କାର୍ଯ୍ୟକର୍ତ୍ତା, ସଂଘ କାର୍ଯ୍ୟକ୍ରମ ସହିତ ନିଜକୁ ଉତ୍ସର୍ଗୀକୃତ କରିଥିବା ସଦସ୍ୟ ଏବଂ ବିଶେଷ ଭାବରେ ଆର୍ଯ୍ୟ ସମାଜର ଛାତ୍ରଛାତ୍ରୀମାନଙ୍କୁ ସମ୍ମାନ ଓ ପୁରସ୍କୃତ କରାଯାଇଥିଲା। ସମାଜର ଉନ୍ନତି ଦିଗରେ ଉଲ୍ଲେଖନୀୟ ଅବଦାନ ଦେଇଥିବା ବ୍ୟକ୍ତିବିଶେଷଙ୍କୁ ମଧ୍ୟ ଏହି ଅବସରରେ ସମ୍ବର୍ଦ୍ଧିତ କରାଯାଇଥିଲା।
ପ୍ରବଚନ ଓ ସାମୂହିକ ସଂକଳ୍ପ ସଭାରେ ବିଭିନ୍ନ ପ୍ରତିଷ୍ଠିତ ଆଚାର୍ଯ୍ୟ ଓ ସନ୍ଥମାନେ ଯୋଗଦେଇ ପ୍ରବଚନ ମାଧ୍ୟମରେ ଧର୍ମ, ନିତ୍ୟ ନୈମିତିକ କର୍ତ୍ତବ୍ୟ ଓ ଦାୟିତ୍ୱ ଉପରେ ପ୍ରାଧାନ୍ୟ ଦେଇଥିଲେ। ବୈଦିକ ଦର୍ଶନ, ମହର୍ଷି ଦୟାନନ୍ଦଙ୍କ ଜୀବନୀ ଓ ଶିକ୍ଷା ଉପରେ ଆଲୋକପାତ କରାଯାଇଥିଲା। ଉପସ୍ଥିତ ଥିବା ପ୍ରତ୍ୟେକ ସଦସ୍ୟ ଏବଂ ଧର୍ମପ୍ରାଣ ବ୍ୟକ୍ତି ବିଶେଷମାନଙ୍କର ଆଗ୍ରହ ଓ ପ୍ରେରଣା ବାସ୍ତବିକ ପ୍ରଣିଧାନ ଯୋଗ୍ୟ ମନେହୋଇଥିଲା। ଭବିଷ୍ୟତରେ ଆର୍ଯ୍ୟ ସମାଜର କାର୍ଯ୍ୟଧାରାକୁ ଆହୁରି ସୁଦୃଢ଼ କରିବା ପାଇଁ ସାମୂହିକ ସଂକଳ୍ପ ଗ୍ରହଣ କରାଯାଇଥଲା।
ଶେଷରେ ସଚିବ ଶ୍ରୀ ସ୍ୱାଇଁ ଏବଂ ଉପସଭାପତି ଶ୍ରୀ ପଣ୍ଡା ସମସ୍ତ ଅତିଥି, ସଦସ୍ୟ ଓ କାର୍ଯ୍ୟକର୍ତ୍ତାଙ୍କୁ ଏହି ଗୌରବମୟ ଉତ୍ସବକୁ ସଫଳ କରିବାରେ ସହଯୋଗ କରିଥିବାରୁ ଆର୍ଯ୍ୟ ସମାଜ ତରଫରୁ ଧନ୍ୟବାଦ ଜ୍ଞାପନ କରିବା ପରେ ସମାରୋହର ଉଦ୍ଯାପନ ହୋଇଥିଲା।
