ଭୁବନେଶ୍ୱର, ଅକ୍ଟୋବର ୩୦: ବିଶିଷ୍ଟ ସାହିତ୍ୟିକ, ଉଦୀୟମାନ କବି ତଥା ମର୍ମଜ୍ଞ ରାଜନୈତିକ ନେତା ଶ୍ରୀ ଶଙ୍କର୍ଷଣ ପରିଡ଼ା (ଶଙ୍କର ଭାଇ) ଆଉ ନାହାଁନ୍ତି। ଆଜି ୩୦/୧୦/୨୦୨୫ ତାରିଖରେ ତାଙ୍କର ପରଲୋକ ହୋଇଯାଇଛି। ତାଙ୍କ ବିୟୋଗରେ ଓଡ଼ିଶାର ସାହିତ୍ୟ, ରାଜନୀତି ଓ ସାମାଜିକ କ୍ଷେତ୍ରରେ ଏକ ଅପୂରଣୀୟ ଶୂନ୍ୟତା ସୃଷ୍ଟି ହୋଇଛି। ଫୁସଫୁସ କର୍କଟ ରୋଗରେ ପୀଡିତ ହୋଇ ଭୁବନେଶ୍ୱରସ୍ଥିତ AIIMS ଠାରେ ଚିକିତ୍ସାଧୀନ ଥିଲେ ଏବଂ ସେଠାରେ ହିଁ ସେ ଶେଷ ନିଶ୍ୱାସ ତ୍ୟାଗ କରିଛନ୍ତି।
ମହାନ ବ୍ୟକ୍ତିତ୍ବ, ସାଧୁତା ଓ ସ୍ମିତହାସ୍ୟ
ଶଙ୍କର ଭାଇ କେବଳ ଜଣେ ଲେଖକ କିମ୍ବା ନେତା ନଥିଲେ, ବରଂ ସେ ଥିଲେ ଏକ ମହାନ ବ୍ୟକ୍ତିତ୍ୱର ପ୍ରତିମୂର୍ତ୍ତି ତାଙ୍କର ସରଳ ବ୍ୟକ୍ତିତ୍ବ, ନିଷ୍କପଟ ହସ ଏବଂ ନିରଳସ କର୍ତ୍ତବ୍ୟନିଷ୍ଠା ତାଙ୍କୁ ସର୍ବଜନ ଆଦୃତ କରିଥିଲା । ସର୍ବଦା ମୁହଁରେ ଏକ ଶାନ୍ତ ଓ ସ୍ନେହଭରା ସ୍ମିତହାସ୍ୟ ଧାରଣ କରୁଥିବା ଶଙ୍କର ଭାଇ ତାଙ୍କର ଉଚ୍ଚ ନୈତିକତା ଏବଂ ଅପରିସୀମ ସାଧୁତା ପାଇଁ ସୁପରିଚିତ ଥିଲେ । ରାଜନୈତିକ ଜୀବନରେ ଥାଇ ମଧ୍ୟ ସେ କୌଣସି ପ୍ରକାର ସ୍ବାର୍ଥପରତାକୁ ସ୍ଥାନ ଦେଇ ନଥିଲେ। ତାଙ୍କର ନିଷ୍ଠାପର କାର୍ଯ୍ୟଶୈଳୀ ଏବଂ ସମସ୍ତଙ୍କୁ ସମ୍ମାନ ଦେବାର ମହାନ ଗୁଣ ତାଙ୍କୁ ଜନସାଧାରଣଙ୍କ ହୃଦୟରେ ଏକ ସ୍ବତନ୍ତ୍ର ସ୍ଥାନ ଦେଇଥିଲା ।
ଉଦାର ଚରିତ୍ର ଓ ଯୋଗଦାନ
ଜଣେ ଉଦାର ଚରିତ୍ରର ମଣିଷ ଭାବରେ, ଶଙ୍କର ଭାଇଙ୍କର ଲେଖନୀ ସବୁବେଳେ ସମାଜର ଦୁର୍ବଳ ବର୍ଗଙ୍କ ପାଇଁ ଶକ୍ତିର ଉତ୍ସ ଥିଲା। ତାଙ୍କ କବିତା ଓ ଗଦ୍ୟ ରଚନାଗୁଡ଼ିକ ଓଡ଼ିଆ ସାହିତ୍ୟକୁ ସମୃଦ୍ଧ କରିବା ସହ ସାଧାରଣ ଲୋକଙ୍କ ଜୀବନୀକୁ ପ୍ରତିଫଳିତ କରୁଥିଲା I ରାଜନୈତିକ କ୍ଷେତ୍ରରେ ମଧ୍ୟ ସେ ନିଜର ବୁଝାମଣା ଓ ମାନବୀୟ ଦୃଷ୍ଟିକୋଣ ପାଇଁ ବେଶ୍ ପ୍ରଶଂସିତ ଥିଲେ। ଶଙ୍କର ଭାଇଙ୍କ ବିୟୋଗରେ ରାଜ୍ୟର ମୁଖ୍ୟମନ୍ତ୍ରୀଙ୍କ ସେମତ ବହୁ ବିଶିଷ୍ଟ ବ୍ୟକ୍ତି ଗଭୀର ଶୋକ ପ୍ରକାଶ କରିଛନ୍ତି। ତାଙ୍କର ମହାନ କାର୍ଯ୍ୟ ଏବଂ ସରଳ, ସାଧୁ ବ୍ୟକ୍ତିତ୍ଵ ସବୁବେଳେ ପ୍ରେରଣାର ଉତ୍ସ ହୋଇ ରହିବ ।
ତାଙ୍କ ମୃତ୍ୟୁରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ସୋସିଆଲ ମିଡିଆ ଏକ୍ସରେ ଶୋକ ପ୍ରକାଶ କରି କହିଛନ୍ତି,ଆମ ଦଳର ବରିଷ୍ଠ ନେତା ତଥା ସୁସାହିତ୍ୟିକ ଶଙ୍କର୍ଷଣ ପରିଡାଙ୍କ ବିୟୋଗ ଖବର ଶୁଣି ମୁଁ ଗଭୀର ଭାବରେ ଦୁଃଖିତ ଓ ମର୍ମାହତ। ତାଙ୍କର ଦେହାନ୍ତ ଓଡ଼ିଶା ରାଜନୀତି ଓ ସାହିତ୍ୟ ଜଗତ ପାଇଁ ଏକ ଅପୂରଣୀୟ କ୍ଷତି।
