ବାସ୍ତବ ବ୍ୟୁରୋ-ରାଜ୍ୟ ଉଚ୍ଚଶିକ୍ଷା ସଚିବ ଶାଶ୍ୱତ ମିଶ୍ର, ରାଜ୍ୟର ସମସ୍ତ ଡିଗ୍ରୀ କଲେଜ ଅଧ୍ୟକ୍ଷମାନଙ୍କୁ ଚିଠି ଲେଖି ଜଣାଇଛନ୍ତି ଯେ, ଯେଉଁ ଡିଗ୍ରୀ କଲେଜରେ କୌଣସି ବିଷୟର ଚାହିଦା ନାହିଁ କିମ୍ବା ଲଗାତର କିଛି ବର୍ଷ ହେବ ଖାଲି ପଡୁଛି ତାହାକୁ ବନ୍ଦ କରି ଦିଆଯାଉ । ନହେଲେ ସେହି ସିଟ୍ ବଦଳରେ ଅନ୍ୟ ଚାହିଦା ଥିବା ବିଭାଗଗୁଡିକର ସିଟ୍ ବୃଦ୍ଧି କରାଯାଉ ।
ସେ ଚିଠିରେ ଉଲ୍ଲେଖ କରି କହିଛନ୍ତି କି, “ଡିଗ୍ରୀ କଲେଜଗୁଡିକରେ ଖୋଲା ଯାଇଥିବା ନୂଆ ବିଭାଗଗୁଡିକରେ ସିଟ୍ ଆଉ ବୃଦ୍ଧି କରାଯିବ ନାହିଁ । ତେବେ, ପଦାର୍ଥ ବିଜ୍ଞାନ, ରସାୟନ ବିଜ୍ଞାନ ଓ ଗଣିତ(ପିସିଏମ୍), ରସାୟନ ବିଜ୍ଞାନ, ଉଦ୍ଭିଦ ବିଜ୍ଞାନ ଓ ପ୍ରାଣୀ ବିଜ୍ଞାନ(ସିବିଜେଡ୍), କଳା ଓ ବାଣିଜ୍ୟ ବିଭାଗରେ ସରକାର ଦ୍ୱାରା ଅନୁମୋଦିତ ସିଟ୍ ରେ କୌଣସି ପରିବର୍ତନ ହେବ ନାହିଁ । ଅନର୍ସରେ ସର୍ବନିମ୍ନ ସିଟ୍ ସଂଖ୍ୟା ୮ ରହିବ ।”
ଯଦି କୌଣସି କଲେଜ ନିର୍ଦିଷ୍ଟ ବିଭାଗରେ ସିଟ୍ କମ ବା ବଢାଇବାକୁ ଚାହୁଁଥିଲେ, ଏହା ବାବଦରେ ରାଜ୍ୟ ଉଚ୍ଚଶିକ୍ଷା ବିଭାଗର ସିଟ୍ ପରିବର୍ତ୍ତନ ପାଇଁ ଅନୁମତି ନେବାକୁ ହେବ । ଆସନ୍ତା ୨୫ ତାରିଖ ସୁଦ୍ଧା କଲେଜଗୁଡିକ ସେମାନଙ୍କର ଆଞ୍ଚଳିକ ଶିକ୍ଷାଧିକାରୀଙ୍କ କାର୍ଯ୍ୟାଳୟରେ ପ୍ରସ୍ତାବଗୁଡିକ ଦାଖଲ କରିବେ ।
