ବାସ୍ତବବ୍ୟୁରୋ:(ନି.ପ୍ର ଭଦ୍ରକ) କରୋନାର କରାଳ ଛାୟାରେ ସାରା ବିଶ୍ୱ ଆଜି ସ୍ତମ୍ବିଭୁତ ହୋଇଯାଇଛି । ୨ୟ ଲହରରେ ଯାବତୀୟ କଟକଣା ସାଙ୍ଗକୁ କଳକବଜା ବନ୍ଦ ରହିବା ଏପରିକି ଲକ୍ ଡାଉନ୍ ଓ ସାପ୍ତାହିକ ୨ ଦିନ ସଟ୍ ଡାଉନ୍ ହେତୁ ଗରିବ ଶ୍ରେଣୀୟ ଲୋକେ ଦୁଇ ଓଳି ଦୁଇ ମୁଠା ଖାଦ୍ୟରୁ ବଂଚିତ ହେଉଛନ୍ତି । ଅନ୍ୟପଟେ ନିକଟରେ ମହାବାତ୍ୟା ‘ୟସ’ ତାଣ୍ଡବ ରଚିଯିବା ପରେ ସଂପ୍ରତି ବନ୍ୟା ଲୋକଙ୍କୁ ବିଭିନ୍ନ ପ୍ରକାରର ମାନସିକ ଓ ଆର୍ଥିକ ନିର୍ଯ୍ୟାତନା ଦେଉଅଛି ।
ଏପରି ସ୍ଥଳରେ ଭଦ୍ରକ ଜିଲ୍ଲା ତିହିଡି ବ୍ଲକ ଜାମଯୋଡି ପଂଚାୟତ ଅଧିନ ସାମନ୍ତରାୟପୁର ଜେନାସାହିର ପ୍ରାୟ ୩୫ ପରିବାର ସରକାରଙ୍କ ପ୍ରଦତ ରାସନ୍ ସାମଗ୍ରୀ ପାଇବାରୁ ବଂଚିତ ହୋଇଥିଭା ଅଭିଯୋଗ ହୋଇଛି । ସଂପୃକ୍ତ ରିଟେଲର ମନଇଛା ସାମଗ୍ରୀ ପ୍ରଦାନ କରୁଛି । ତିନି ମାସର ଥରେ କିରୋସିନ୍ ଦେଉଥିବା ବେଳେ ଚାଉଳ ଓ ଗହମ ଦୁଇ ମାସରେ ଥରେ ଦେଇଥାଏ । ଅଭାବ ଅନାଟନ ସମୟରେ ଏହି ଦଳିତ ପରିବାର ଲୋକେ ଉପାସ ଭୋକରେ କାଳାତିପାତ କରୁଥିବା ବେଳେ ପ୍ରଶାସନ ସେମାନଙ୍କ ନିକଟରେ ପହଂଚି ନଥିବା ମଧ୍ୟ କୁହାଯାଉଛି । ତେବେ ମଇ ଓ ଜୁନ୍ ମାସରେ ସେମାନଙ୍କ ସାମଗ୍ରୀ ମିଳିନଥିବାରୁ ତିବ୍ର ଅସନ୍ତୋଷ ପ୍ରକାଶ ପାଇଛି ।
ଏନେଇ ସେମାନେ ସ୍ଥାନୀୟ ସରପଂଚଙ୍କ ଠାରୁ ଆରମ୍ଭ କରି ଜିଲ୍ଲା ପରିଷଦ ସଭ୍ୟାଙ୍କ ଦୃଷ୍ଟି ଆକର୍ଷଣ କରିଥିଲେ ହେଁ ଏଯାଏଁ କୌଣସି ସୁଫଳ ମିଳିନଥିବା ଅଭିଯୋଗ କରିଛନ୍ତି । ଲକ୍ ଡାଉନ୍ ସତ୍ୱେ ଗଣମାଧ୍ୟମ ଜରିଆରେ ଏହି ଗ୍ରାମବାସୀ ବ୍ଲକ ପ୍ରଶାସନ ଦୃଷ୍ଟି ଆକର୍ଷଣ କରିବା ସହିତ ତୁରନ୍ତ ସେମାନଙ୍କୁ ରାସନ୍ ସାମଗ୍ରୀ ଯୋଗାଇ ଦେବାକୁ ଦାବୀ କରିଛନ୍ତି ।
