ନବୀନ ଦାସ(ଦେବଗଡ) ୨୧।୧-ମୋବାଇଲ ଟାୱାର ପାଇଁ,୫ଟି ଗ୍ରାମ ପଞ୍ଚାୟତରେ କୌଣସି ପଦବୀ ପାଇଁ ପ୍ରାର୍ଥୀ କଲେନାହିଁ ନାମାଙ୍କନ ।ନିର୍ବାଚନ ବର୍ଜନ ପ୍ରସଙ୍ଗରେ ଜିଲ୍ଲାପାଳଙ୍କ ସହ ଆଲୋଚନାବି ବିଫଳ ହୋଇଛି । ମୋବାଇଲ ଟାୱାର ନହେଲେ ଭୋଟ୍ ବର୍ଜନ ନିଷ୍ପତ୍ତିରେ ଅଟଳ ରହିଛନ୍ତି ଅଞ୍ଚଳବାସୀ । ଏହି ୫ଟି ଗ୍ରାମ ପଞ୍ଚାୟତ ହେଲା ଦେବଗଡ ଜିଲ୍ଲା ତିଲେଇବଣୀ ବ୍ଲକ ଅନ୍ତର୍ଗତ ଝରାଗୋଗୁଆ, ଗଣ୍ଡମ, ପାରପୋଷୀ, ଡିମିରିକୁଦା ଓ ଝାରମୁଣ୍ଡା ଗ୍ରାମବାସୀ ।
ଚଳିତ ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ଦେବଗଡ ଜିଲ୍ଲାରେ ପ୍ରଶାସନ ପାଇଁ ମୁଣ୍ଡ ବ୍ୟଥାର କାରଣ ପାଲଟିଛି ଏହି ୫ଟି ଗ୍ରାମ ପଞ୍ଚାୟତର ଅଧିବାସୀ ନିଷ୍ପତ୍ତି । ପ୍ରଥମେ ତିଲେଇବଣୀ ବ୍ଲକ ଅନ୍ତର୍ଗତ ଝରାଗୋଗୁଆ, ପାରପୋଷୀ, ଡିମିରିକୁଦା ଓ ଗଣ୍ଡମ ଗ୍ରାମ ପଞ୍ଚାୟତ ଅଧିବାସୀ ମୋବାଇଲ ଟାୱାର ନଥିବା ଯୋଗୁଁ ଚଳିତ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ବର୍ଜନ ନିଷ୍ପତ୍ତି ନେଇଥିବା ବେଳେ ଏଥିରେ ସାମିଲ ହୋଇଛନ୍ତି ଝାରମୁଣ୍ଡା ଗ୍ରାମ ପଞ୍ଚାୟତ ଅଧିବାସୀ ।
ମୋବାଇଲ ଟାୱାର ନଥିବା ଯୋଗୁଁ ଏହି ଅଞ୍ଚଳରେ ଥିବା ଛାତ୍ରଛାତ୍ରୀଙ୍କଠାରୁ ସାଧାରଣ ଜନତା ଅସୁବିଧାର ସମ୍ମୁଖୀନ ହେଉଥିବା ଅଭିଯୋଗ ଦୁଇ ବର୍ଷ ଧରି ଅଞ୍ଚଳବାସୀ କରି ଆସୁଥିଲେ ମଧ୍ୟ ଫଳ ଶୂନ ।ସୂଚନା ଅନୁସାରେ,ଏନେଇ ଜିଲ୍ଲାର ଏହି ଅପହଞ୍ଚ ଇଲାକା ଭାବେ ପରିଚିତ ଲଇମୁରା ଅଞ୍ଚଳର ୫ଟି ଗ୍ରାମ ପଞ୍ଚାୟତ ଅଧିବାସୀଙ୍କ ସହ ଜିଲ୍ଲା ପ୍ରଶାସନ ପକ୍ଷରୁ ଆଲୋଚନା କରାଯାଇଥିଲେବି ତାହା ବିଫଳ ହୋଇଛି ।
