ପ୍ରମୋଦ ନାୟକ(ଭୁବନେଶ୍ୱର): ଉତ୍ତର ଭୁବନେଶ୍ୱର ଅଞ୍ଚଳରେ ଆତଙ୍କ ଖେଳାଇଛି ଡେଙ୍ଗୁ । ଡେଙ୍ଗୁ ଆକ୍ରାନ୍ତଙ୍କ ମୃତ୍ୟୁ ହୋଇଥିବା ସୂଚନା ମିଳିଛି । ମୃତ ବ୍ୟକ୍ତି ଜଣକ ଡମଣା ଗ୍ରାମର ହୃଦାନନ୍ଦ ବାରିକ୍(୬୫) । ହୃଦାନନ୍ଦଙ୍କ ପୁଅଙ୍କ କହିବା ଅନୁଯାଇ ତାଙ୍କ ବାପା ଗତ ଶନିବାର ଠାରୁ ଡେଙ୍ଗୁରେ ଆକ୍ରାନ୍ତ ହୋଇ ଏକ ଘରୋଇ ହସପିଟାଲରେ ଚିକିତ୍ସିତ ହେଉଥିଲେ ।ଏହାକୁ ନେଇ ସ୍ଥାନୀୟ ଅଞ୍ଚଳରେ ଭୟର ବାତାବରଣ ଖେଳି ଯାଇଛି ।
ସୂଚନା ଅନୁଯାୟୀ ଡମଣା, ହାଉସିଂବୋର୍ଡ କଲୋନୀ, ପ୍ରାଚିବିହାର, ନିଳାଦ୍ରୀବିହାର, ଶୈଳଶ୍ରୀବିହାର ଆଦି ଅଞ୍ଚଳରେ ଡେଙ୍ଗୁ ଜ୍ୱର ଯୋଗୁ ଶତାଧିକ ଲୋକ ଗୁରୁତର ହୋଇ ହସପିଟାଲରେ ଭର୍ତ୍ତି ହେଉଥିବା ବେଳେ ବିଏମସି ପାଖରେ ଏନେଇ ସ୍ପଷ୍ଟ ସୂଚନା ରହୁନାହିଁ । ଲୋକ ଦେଖାଣିଆ ଭାବେ ବିଏମ୍ସି ଅଧିକାରୀମାନେ କର୍ପୋରେଟରମାନଙ୍କ ସହାୟତାରେ ସେମାନଙ୍କ ଅଞ୍ଚଳରେ କେବଳ ମଶାମରା ଧୁଆଁ ଛାଡ଼ି ନିଜର କର୍ତ୍ତବ୍ୟ ଶେଷ କରୁଥିବା ଅଭିଯୋଗ ହେଉଛି ।
ଫଳରେ ଡେଙ୍ଗୁ ଆକ୍ରାନ୍ତଙ୍କ ସଂଖ୍ୟା ବଢିବାରେ ଲାଗିଛି ।ଏହି ରୋଗରେ ଗତ ୯ ତାରିଖରେ ପ୍ରାଚିବିହାର ପ୍ଲଟ ନଂ ୫୮ ରେ ରହୁଥିବା ଆଡିସିନାଲ ଡିସିପି ସୁଦର୍ଶନ ସେଠୀଙ୍କର ମୃତ୍ୟୁ ହୋଇଥିଲା । ସରକାରୀ ଭାବେ ସହରରୁ ଚିହ୍ନଟ ରୋଗୀଙ୍କ ସଂଖ୍ୟା ୧୦ରୁ କମ୍ ରହୁଥିବା ବେଳେ ବେସରକାରୀ ସଂଖ୍ୟା ୧୦୦ ଡେଇଁଥିବା କୁହାଯାଉଛି । ବିଶେଷକରି ବସ୍ତି ଅଞ୍ଚଳରେ ସଂଖ୍ୟାଧିକ ଆକ୍ରାନ୍ତ ଚିହ୍ନଟ ହୋଇ ସାରିଲେଣି । ଡେଙ୍ଗୁରେ ଆକ୍ରାନ୍ତ ହୋଇ ଚିକିତ୍ସିତ ଅବସ୍ଥାରେ ଏକାଧିକ ସଂକ୍ରମିତ ମୃତ୍ୟୁ ବରଣ କରିବା ପରେ ସାଧାରଣ ଲୋକଙ୍କ ମନରେ ଛନକା ପଶିବା ଆରମ୍ଭ ହେଲାଣି ।
ଅନ୍ୟପକ୍ଷରେ ଡେଙ୍ଗୁର ମୁକାବିଲା ପାଇଁ ବିଏମ୍ସି ସଚେତନ ଅଛି ଓ ବିଭିନ୍ନ କାର୍ଯ୍ୟ କରାଯାଉଛି ବୋଲି ମେୟର ସୁଲୋଚନା ଦାସ ଆଶ୍ୱାସନା ଦେଇଛନ୍ତି । ସ୍ଥାନୀୟ ବାସିନ୍ଦାଙ୍କ କହିବାନୁସାରେ ଆଗକୁ ବର୍ଷା ଦିନ ଆସୁଥିଲେ ମଧ୍ୟ ବିଏମ୍ସି ନିଦାବିଷ୍ଣୁ ପାଲଟିିଛି । ଉତ୍ତର ଜୋନ୍ ଡେପୁଟି କମିସନର୍ ପୁରନ୍ଦର ନନ୍ଦ ସ୍ଥାନୀୟ ବାସିନ୍ଦାଙ୍କ ସମସ୍ୟାକୁ କର୍ଣ୍ଣପାତ କରୁନଥିବା ବାରମ୍ବାର ଅଭିଯୋଗ ହେଉଛି । ବିଏମ୍ସିର ସିଟି ହେଲ୍ଥ ଅଫିସରଙ୍କ ସୂଚନା ଅନୁଯାୟୀ ସଂକ୍ରମିତ ହେଉଥିବା ବା ଲକ୍ଷଣ ଥିବା ଅଧିକାଂଶ ବ୍ୟକ୍ତି ଘରୋଇ ହସ୍ପିଟାଲରେ ପରୀକ୍ଷା କରୁ ଥିବାରୁ ବିଏମ୍ସି ପାଖରେ ସଠିକ୍ ତଥ୍ୟ ମିଳି ପାରୁନାହିଁ ।
ଅନ୍ୟପଟେ ଘରୋଇ ହସ୍ପିଟାଲ ଗୁଡିକରେ ଠିକ୍ ଭାବେ ପରୀକ୍ଷା କରା ନ ଯାଇ କେବଳ କାର୍ଡ ଟେଷ୍ଟ କରାଯାଉଥିବା ଅଭିଯୋଗ ହେଉଛି । ଫଳରେ ଅନେକ ସମୟରେ ସଠିକ୍ ରିପୋର୍ଟ ମଧ୍ୟ ମିଳୁନାହିଁ । ସରକାରଙ୍କ ଦ୍ୱାରା କ୍ୟାପିଟାଲ ହସ୍ପିଟାଲ ଏବଂ ଆରଏମ୍ଆରସି ଠାରେ ଡେଙ୍ଗୁ ଟେଷ୍ଟ ପାଇଁ ବ୍ୟବସ୍ଥା କରାଯାଇଛି । ଏଠାରେ ଟେଷ୍ଟ କରାଇବା ଦ୍ୱାରା ସଠିକ୍ ରିପୋର୍ଟ ମିଳିଥାଏ । ଡେଙ୍ଗୁର ସ୍ଥିତି ନେଇ କ୍ୟାପିଟାଲ ହସ୍ପିଟାଲ ନିର୍ଦ୍ଦେଶକ ଲକ୍ଷ୍ମୀଧର ସାହୁ କହିଛନ୍ତି, ବର୍ତ୍ତମାନ ହସ୍ପିଟାଲରେ ୪ ଜଣ ଡେଙ୍ଗୁରୋଗୀ ଅଛନ୍ତି । ପ୍ରତିଦିନ କିଛି କିଛି ଟେଷ୍ଟ କରାଯାଉଛି । ତେବେ ସ୍ଥିତି ଭଲ ଅଛି । ସବୁ ବର୍ଷ ଭଳି ଚଳିତ ବର୍ଷ ମଧ୍ୟ ଡେଙ୍ଗୁ ପାଇଁ ପ୍ରସ୍ତୁତ ରହିଛି ।
ଡେଙ୍ଗୁ ରୋଗୀଙ୍କ ପାଇଁ ୱାର୍ଡ ରହିଛି ।ଅଧିକ ରୋଗୀ ଆସିଲେ ସେମାନଙ୍କ ପାଇଁ ସ୍ୱତନ୍ତ୍ର ୱାର୍ଡ କରାଯିବ । ପ୍ରତ୍ୟେକଙ୍କୁ ମଶାରୀ ଦିଆଯିବ । ଟେଷ୍ଟ ପାଇଁ ସମସ୍ତ ଆନୁସଙ୍ଗିକ ବ୍ୟବସ୍ଥା ରହିଛି। ବିଏମସି ସୂଚନା ମୁତାବକ ଏବେ ବର୍ଷା ଋତୁ ଆସିଥିବାରୁ ଡେଙ୍ଗୁ ରୋଗ ହେବ । ଯେଉଁ ଘରୁ ସଂକ୍ରମିତ ଚିହ୍ନଟ ହୋଇଥାନ୍ତି ତାହାର ପାଖାପାଖ ୩୦ରୁ ୪୦ ଘର ପର୍ଯ୍ୟନ୍ତ ଆଣ୍ଟି ଲାର୍ଭା ପ୍ରକ୍ରିୟା କରାଯାଏ । ଘରେ ତଥା ଏହାର ଆଖପାଖ ଅଞ୍ଚଳରେ ଯେପରି ପାଣି ଜମି ନରହିବ ପ୍ରତି ୭ ଦିନରେ ଥରେ ସେଠାରେ ସଫା କରିବା ଆଦି ବିଭିନ୍ନ ସଂକ୍ରାନ୍ତରେ ବିଏମ୍ସିର ସ୍ୱତନ୍ତ୍ର ଟିମ୍ ଲୋକଙ୍କୁ ସଚେତନ କରାଯିବା ନେଇ ବନ୍ଦୋବସ୍ତ କରାଯାଉଛି ।
ସେହିପରି ମଶାତେଲ (କେମେଫୋସ୍) ସିଞ୍ଚନ କରାଯିବାର ବନ୍ଦୋବସ୍ତ କରାଯାଇଛି । ଲୋକମାନଙ୍କୁ ସଚେତନ କରିବା ସହିତ ଟାୟାର, ପଇଡ ଖୋଳ ଆଦି ଯେପରି ରାସ୍ତା କଡରେ ପଡି ନରହେ ଏବଂ ସେଥିରେ ଯେପରି ପାଣି ଜମି ନ ରହେ ସେଥିପ୍ରତି ଦୃଷ୍ଟି ଦିଆଯାଉଛି । ଏହାସହିତ ମଶାଧୁଆଁ, ସଫେଇ କାର୍ଯ୍ୟ ଜାରି ରହିଥିବା ବିଏମସି ପକ୍ଷରୁ କୁହାଯାଉଛି । କେବକ ସଚେତନତା ବାର୍ତ୍ତା ଦେଇ ମଶା ଧୂଆଁ ଦେବା ସହ ଡେଙ୍ଗୁ ମଶା କିପରି ନ ବ୍ୟାପେ ସେଥିପାଇଁ ବିଶେଷ ଦୃଷ୍ଟି ଦେଇ ସମଗ୍ର ଅଞ୍ଚଳରେ କିପରି ପାଣି ନଜମେ ସେଥିପାଇଁ ପଦକ୍ଷେପ ନେବା ଆବଶ୍ୟକ।ବିଏମସି ଡେଙ୍ଗୁ କୁ ନେଇ କେତେ ସଜାଗ ସମୟ କହିବି । ହେଲେ ସାଧାରଣ ଲୋକେ ଭୟଭୀତ ନହୋଇ ନିଜେ ସଚେତନ ହେବା ଜରୁରୀ ।
