କେନ୍ଦ୍ରାପଡ଼ା(ଚତୁର୍ଭୁଜଦାଶ):ବନ୍ୟା ସମୟରେ ରିଲିଫ୍ ଓ ଉଦ୍ଧାର କାର୍ଯ୍ୟରେ ଅବହେଳା, ଅନୁଶାସନହୀନତା, ବିନା ଅନୁମତିରେ ଅନୁପସ୍ଥିତି, ଉଚ୍ଚ ଅଧିକାରୀଙ୍କ ନିର୍ଦ୍ଦେଶ ଅମାନ୍ୟ କରିବା, OAP ଟଙ୍କା ଆତ୍ମସାତ୍ ସମ୍ପର୍କିତ ଅଭିଯୋଗ ଏବଂ ସରକାରୀ କର୍ତ୍ତବ୍ୟ ସମ୍ପାଦନରେ ଗୁରୁତର ଅନିୟମିତତା ଭଳି ଅଭିଯୋଗକୁ ନେଇ ରାଜକନିକା ବ୍ଲକର ୨ ଜଣ ପଞ୍ଚାୟତ ନିର୍ବାହୀ ଅଧିକାରୀ (PEO)ଙ୍କୁ ନିଲମ୍ବିତ କରାଯାଇଛି।
ନିଲମ୍ବିତ ଅଧିକାରୀମାନେ ହେଲେ ରାଜକନିକା ବ୍ଲକର PEO ଶ୍ରୀ କାଶୀରାୟ ମାଝୀ ଏବଂ ଭରିଗଡ଼ା ଗ୍ରାମ ପଞ୍ଚାୟତର PEO ଶ୍ରୀ ଦାସା ମୁର୍ମୁ।ରାଜକନିକା ବିଡିଓଙ୍କ ପକ୍ଷରୁ ଦାଖଲ ହୋଇଥିବା ପୃଥକ ରିପୋର୍ଟ ଆଧାରରେ କେନ୍ଦ୍ରାପଡ଼ା ଜିଲ୍ଲାପାଳ, ଓଡ଼ିଶା ସିଭିଲ୍ ସର୍ଭିସେସ୍ (କ୍ଲାସିଫିକେସନ୍, କଣ୍ଟ୍ରୋଲ୍ ଆଣ୍ଡ ଅପିଲ୍) ରୁଲ୍ସ, ୧୯୬୨ର ନିୟମ ୧୨(୧) ଅନୁଯାୟୀ ବିଭାଗୀୟ ତଦନ୍ତ ପ୍ରକ୍ରିୟା ଚାଲିଥିବା ସମୟରେ ଉଭୟ ଅଧିକାରୀଙ୍କୁ ତତ୍କାଳ ପ୍ରଭାବରେ ନିଲମ୍ବନ କରିଛନ୍ତି।
ନିଲମ୍ବନ ଅବଧିରେ ଉଭୟ ଅଧିକାରୀଙ୍କ ମୁଖ୍ୟାଳୟ ଗରଦପୁର ପଞ୍ଚାୟତ ସମିତି କାର୍ଯ୍ୟାଳୟରେ ଧାର୍ଯ୍ୟ କରାଯାଇଛି। ସମ୍ପୃକ୍ତ ଅଧିକାରୀମାନେ ବିଡିଓ, ଗରଦପୁରଙ୍କ ପୂର୍ବ ଅନୁମତି ବିନା ମୁଖ୍ୟାଳୟ ଛାଡ଼ିପାରିବେ ନାହିଁ।
ଉଭୟ ଅଧିକାରୀଙ୍କ ବିରୋଧରେ ବିଭାଗୀୟ ଶୃଙ୍ଖଳାଗତ ପ୍ରକ୍ରିୟା ଆରମ୍ଭ ପାଇଁ ନିର୍ଦ୍ଧାରିତ ଫର୍ମାଟ୍ରେ ମେମୋରାଣ୍ଡମ୍, ଅଭିଯୋଗର ଧାରା, ଅଭିଯୋଗ ସମ୍ପର୍କିତ ବିବରଣୀ ଓ ପ୍ରମାଣପତ୍ର ଆଦି ପ୍ରସ୍ତୁତ କରି ୧୫ ଦିନ ମଧ୍ୟରେ ଜିଲ୍ଲାପାଳଙ୍କ ନିକଟରେ ଦାଖଲ କରିବାକୁ ରାଜକନିକା ବିଡିଓଙ୍କୁ ନିର୍ଦ୍ଦେଶ ଦିଆଯାଇଛି।
ସରକାରୀ କର୍ତ୍ତବ୍ୟ ସମ୍ପାଦନରେ ଅବହେଳା ଓ ଅନିୟମିତତା ପ୍ରତି ପ୍ରଶାସନର ଶୂନ୍ୟ-ସହନଶୀଳତା ନୀତିର ଅଂଶ ଭାବେ ଏହି ପଦକ୍ଷେପ ନିଆଯାଇଛି।
