ସଂଜୟ ଶତପଥୀ(କଟକ):ସଂପ୍ରତି କଟକ ସହରର ରାସ୍ତାଘାଟ ଶୋଚନୀୟ ହୋଇପଡିଛି। କଟକ ମହାନଗର ନିଗମ ସ୍ବାସ୍ଥ୍ଯ ବିଭାଗର ରାସ୍ତା ସଫେଇ ଦିଗରେ ଅପାରଗତା ଚରମ ସୀମାରେ ପହଞ୍ଚିଛି, ଯାହାଫଳରେ କି କଟକ ସହରର ରାସ୍ତାଘାଟ ଉପରେ ବାଲି,ମାଟି ଓ ନର୍ଦ୍ଦମା ମାଟି ଜମା ହେବା ଫଳରେ ଜନସାଧାରଣଙ୍କ ଯାତାୟତରେ ଅସୁବିଧା ହେବା ସହ ବିଭିନ୍ନ ପ୍ରକାର ଦୁର୍ଘଟଣା ଓ ଅସ୍ୱାସ୍ଥ୍ୟକର ପରିବେଶ ସୃଷ୍ଟି ହୋଇଛି।
କେବଳ ନିୟୋଜିତ ଟ୍ରାଫିକ୍ ପୋଲିସ୍ କର୍ମଚାରୀ ଙ୍କର ଫଟୋଉଠା ଓ ଜୋରିମାନା ଆଦାୟ ପରିଲକ୍ଷିତ ହେଉଛି। ମାନନୀୟ ମେୟର ମହୋଦୟଙ୍କର ଇଉରୋପ କରିବାର ପରିକଳ୍ପନା କଳ୍ପନା ରେ ହିଁ ରହିଛି ବୋଲି ଜନସାଧାରଣରେ ପ୍ରକାଶ ପାଇଥିଲା ବେଳେ ଏହି ପରିପ୍ରେକ୍ଷୀରେ କଟକ ର ଜଣାଶୁଣା ଅଗ୍ରଣୀ ସମାଜସେବୀ ଅନୁଷ୍ଠାନ ସୁଭାଷ ସଂଗଠନ ପକ୍ଷରୁ ଏହାକୁ ପ୍ରତିବାଦ କରି ଆବାହକ ଶ୍ରୀ ଜ୍ଞାନରଞ୍ଜନ ଦାସଙ୍କ ନେତୃତ୍ୱରେ ଶତାଧିକ ସଦସ୍ୟ ଏକ ଅଭିନବ ଢ଼ଙ୍ଗରେ କୋଡ଼ି, କୋଦାଳ ଓ କରେଇ ମୁଣ୍ଡରେ ଧରି ବିଭିନ୍ନ ପ୍ରକାର ସ୍ଲୋଗାନ ଦେଇ କଟକ ମଙ୍ଗଳାବାଗ ରିଙ୍ଗ ରୋଡ ରେ ଥୂବା ସୃଷ୍ଟି ହସ୍ପିଟାଲ ସମ୍ମୁଖରୁ ବାହାରି ବକ୍ସି ବଜାର ଛକ,ଦରଘାବଜାର ଓ ଚୈ।ଧୁରୀବଜାର ଦେଇ କଟକ ମହାନଗର ନିଗମ କାର୍ଯ୍ୟାଳୟ ସମ୍ମୁଖରେ ପହଞ୍ଚିଥିଲେ।
କଟକ ସହରର ରାସ୍ତାଘାଟ, ନାଳ ନର୍ଦ୍ଦମା ସଫା କରିବା ଦିଗରେ କଟକ ମହାନଗର ନିଗମ କର୍ତ୍ତୃପକ୍ଷ ତୁରନ୍ତ ପଦକ୍ଷେପ ନେବାକୁ ସଂଗଠନର ସଦସ୍ୟମାନେ ଦାବି କରିବା ସହ ଯଦି ତୁରନ୍ତ ନ କରନ୍ତି ତେବେ ଆଗାମୀ ଦିନରେ ଏହି ଆନ୍ଦୋଳନ ବିରାଟ ରୁପ ନେବ ବୋଲି ସଂଗଠନ ପକ୍ଷରୁ ଚେତାବନୀ ଦିଆଯାଇଛି। ଶାନ୍ତି ଶୃଙ୍ଖଳା ରକ୍ଷା ଲାଗି କଟକ କମିଶନରେଟ୍ ପୋଲିସ୍ ପକ୍ଷରୁ ବ୍ୟାପକ ପୋଲିସ୍ ମୂତୟନ କରାଯାଇଥୂଲା।
