ବାସ୍ତବ ବ୍ୟୁରୋ: ଆସାମରେ ବନ୍ୟା। ପ୍ରବଳ ବର୍ଷା ଯୋଗୁଁ ଫୁଲୁଛି ବ୍ରହ୍ମପୁତ୍ର ନଦୀ। ଫଳରେ ଅନେକ ତଳିଆ ଅଞ୍ଚଳ ଏବେ ଜଳମଗ୍ନ। ୧୩ ଜିଲ୍ଲାର ପ୍ରାୟ ୩୮ ହଜାର ଲୋକେ ବନ୍ୟା ଯୋଗୁଁ ପ୍ରଭାବିତ ହୋଇଛନ୍ତି। ୭୭ଟି ଗାଁ ପାଣି ଘେରରେ ରହିଥିବା ବେଳେ ୨୦୯.୬୭ ହେକ୍ଟର ଚାଷ ଜମି ଜଳମଗ୍ନ ହୋଇଥିବାରୁ ବ୍ୟାପକ ଫସଲ ନଷ୍ଟ ହୋଇଛି।
ସ୍ଥିତି ମୁକାବିଲା ଲାଗି ପ୍ରସ୍ତୁତ ଥିବା କହିଛନ୍ତି ରାଜ୍ୟ ସରକାର। ରିଲିଫ ଏବଂ ଉଦ୍ଧାର କାର୍ଯ୍ୟ ଲାଗି ସେନା ବାହିନୀ, ଏୟାରଫୋର୍ସ ଏବଂ ଏନଡିଆରଏଫ୍ ସମେତ ବିଭିନ୍ନ ସଂସ୍ଥା ପ୍ରସ୍ତୁତ ରହିଛନ୍ତି।
ନଦୀରେ ପାଣି ବଢ଼ୁଥିବାରୁ ଗୁଆହଟୀ ନିକଟରେ ଜଳମଗ୍ନ ହୋଇଗଲାଣି ତଳିଆ ଅଞ୍ଚଳ। ପାଣି ଘେରରେ ରହିଛି କନଷ୍ଟ୍ରକ୍ସନ ସାଇଟ୍। ବ୍ରହ୍ମପୁତ୍ର ନଦୀ ମଝିରେ ଥିବା ଭଗବାନ ବିଷ୍ଣୁଙ୍କର ଅନନ୍ତ ଶୟନ ମୂର୍ତ୍ତି ମଧ୍ୟ ବୁଡ଼ିବାକୁ ବସିଲାଣି। ଆସାମର ଅନେକ ଜିଲ୍ଲାରେ ତଳିଆ ଅଞ୍ଚଳରେ ପଶିଲାଣି ବ୍ରହ୍ମପୁତ୍ର ନଦୀର ପାଣି। ଘରେ ପାଣି ପଶିବା ପରେ ଲୋକେ ଘର ଛାଡି ନଦୀ ବନ୍ଧରେ ଅସ୍ଥାୟୀ କୁଡ଼ିଆ କରି ଆଶ୍ରୟ ନେଇଛନ୍ତି।
ପ୍ରବଳ ବର୍ଷା ଯୋଗୁଁ ବନ୍ୟା ଦୁର୍ଦ୍ଦଶା ଆହୁରି ବଢ଼ିଯାଇଛି। ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି।
