ବାସ୍ତବବ୍ୟୁରୋ: “ରକ୍ତ ଦାନ ମହତ ଦାନ” ଏହି ମତରେ ଦୁନିଆର ବହୁ ସ୍ବେଚ୍ଛାସେବୀ,ସ୍ବେଚ୍ଛାକୃତ ରକ୍ତଦାନ ଅଭିଯାନରେ ସାମିଲ ହୁଅନ୍ତି ଏବଂ ରକ୍ତଦାନ କରି ବହୁମୂଲ୍ୟ ଜୀବନ ବଂଚାଇବାରେ ସହାୟକ ହୁଅନ୍ତି | ହେଲେ କରୋନା କାଳରେ ଏ ନେଇ ଦ୍ୱନ୍ଦ ଉପୁଜିଥିଲା Iପୂର୍ବରୁ ଯେଉଁ ଆଶଙ୍କାରେ ଟିକାକରଣ ଓ ରକ୍ତଦାନକୁ ନେଇ ନିୟମାବଳୀ ଜାରି କରାଯାଇଥିଲା, ବିଶେଷଜ୍ଞମାନଙ୍କ ସମୀକ୍ଷା ପରେ ସେଥିରେ ପରିବର୍ତ୍ତନ କରାଯାଇଛି। ଏ ନେଇ ଜାରି ହୋଇଛି ନୂଆ ଗାଇଡ୍ଲାଇନ୍। ଏବେ କରୋନା ଟିକାର ଯେ କୌଣସି ଡୋଜ୍ ନେଇଥିବା ବ୍ୟକ୍ତି ୧୪ ଦିନ ପରେ କରିପାରିବେ ରକ୍ତଦାନ । ଏହି ନୂଆ ନିୟମ ଦ୍ବାରା ସମଗ୍ର ଦେଶରେ ରକ୍ତଦାନ ଅଭିଯାନ ଆଉ ବିଶେଷ ପ୍ରଭାବିତ ହେବ ନାହିଁ ।
ଏସ୍ସିବି ଟ୍ରାନ୍ସଫ୍ୟୁଜନ୍ ମେଡିସିନ୍ ବିଭାଗ ମୁଖ୍ୟ ତଥା ଏସ୍ସିବି ରକ୍ତଭଣ୍ଡାର ଅଧିକାରୀ ପ୍ରଫେସର ଡାକ୍ତର ପଙ୍କଜ ପରିଡ଼ା କହିଛନ୍ତି ଯେ ଆଇସିଏମ୍ଆର ପକ୍ଷରୁ ଏଭଳି ନୂଆ ଗାଇଡ୍ଲାଇନ୍ ଜାରି ହେବା ପରେ ରକ୍ତଦାନ କ୍ଷେତ୍ରରେ ପୁଣି ନୂଆ ଉତ୍ସାହ ସୃଷ୍ଟି କରିବ ବୋଲି ଆଶା କରାଯାଉଛି। ଡାକ୍ତର ପରିଡ଼ାଙ୍କ କହିବା ଅନୁସାରେ ପୂର୍ବରୁ ଜାରି କରାଯାଇଥିବା ଗାଇଡ୍ଲାଇନ୍ ଅନୁସାରେ ଜଣେ ପ୍ରଥମ ଡୋଜ୍ ଟିକା ଓ ୨ୟ ଡୋଜ୍ ଟିକା ନେବା ଭିତରେ ରକ୍ତଦାନ କରିବା ବାରଣ ଥିଲା। ଏମିତିକି ଦ୍ବିତୀୟ ଡୋଜ୍ ନେବାର ୨୮ ଦିନ ପରେ ଜଣେ ଯାଇ ରକ୍ତଦାନ କରି ପାରିବ ବୋଲି କୁହାଯାଇଥିଲା। ଏଭଳି ପ୍ରକ୍ରିୟାରେ ପ୍ରଥମ ଡୋଜ ନେବାର ପାଖାପାଖି ୨ରୁ ୩ ମାସ ପର୍ଯ୍ୟନ୍ତ ଜଣେ ରକ୍ତଦାତା ରକ୍ତଦାନ କରିବା ଉପରେ ଅଙ୍କୁଶ ଥିଲା। କିନ୍ତୁ ବିଶେଷଜ୍ଞ ମାନଙ୍କ ସମୀକ୍ଷା ପରେ ଏବେ ପ୍ରଥମ ଡୋଜ୍ ନେବାର ୧୪ ଦିନ ପରେ ଜଣେ ରକ୍ତଦାନ କରିପାରିବେ। ସେହିଭଳି ଦ୍ବିତୀୟ ଡୋଜ୍ ଯେଉଁମାନେ ନେଇଥିବେ ସେମାନେ ବି ଟିକା ନେବାର ୧୪ ଦିନ ପରେ ରକ୍ତଦାନ କରିପାରିବେ। ଏହା ଦ୍ବାରା ସ୍ବେଚ୍ଛାକୃତ ରକ୍ତଦାନ ଅଭିଯାନ ବିଶେଷ ପ୍ରଭାବିତ ହେବ ନାହିଁ ।
