ଭୁବନେଶ୍ୱର(ପ୍ରଶାନ୍ତ ପାଇକରାୟ):ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ଆନୁକୁଲ୍ୟରେ ଗୁରୁ କେଳୁଚରଣ ମହାପାତ୍ର ଓଡ଼ିଶୀ ଗବେଷଣା କେନ୍ଦ୍ର ଦ୍ୱାରା ଆୟୋଜିତ ଶ୍ରୀ ଜଗନ୍ନାଥ ଭକ୍ତି ସଙ୍ଗୀତ ସମାରୋହ ‘ଗୁହାରି ୨୦୨୬’ର ଉଦ୍ଘାଟନୀ ଉତ୍ସବ ଭୁବନେଶ୍ୱରର ରବିନ୍ଦ୍ର ମଣ୍ଡପରେ ଏକ ବର୍ଣ୍ଣାଢ୍ୟ ଓ ମନୋଜ୍ଞ ପରିବେଶ ଭିତରେ ଆରମ୍ଭ ହୋଇଯାଇଅଛି ।
ଏହି ତିନି ଦିନିଆ ସଙ୍ଗୀତ କାର୍ଯ୍ୟକ୍ରମରେ ରାଜ୍ୟର ବହୁ ବିଶିଷ୍ଟ ଓ ସ୍ୱନାମଧନ୍ୟ କଣ୍ଠଶିଳ୍ପୀମାନେ ଯୋଗଦାନ କରି ମହାପ୍ରଭୁଙ୍କ ଉଦ୍ଦେଶ୍ୟରେ ଭାବଭକ୍ତିପୂର୍ଣ୍ଣ ପାରଂପରିକ ଭଜନ ଓ ଜଣାଣ ପରିବେଷଣ କରି ଭକ୍ତିମୟ ପରିବେଶ ସୃଷ୍ଟି କରନ୍ତି । ଗୁରୁ କେଳୁଚରଣ ମହାପାତ୍ର ଓଡ଼ିଶୀ ଗବେଷଣା କେନ୍ଦ୍ର ୨୦୧୨ ମସିହାରୁ ମହାପ୍ରଭୁ ଶ୍ରୀଜଗନ୍ନାଥଙ୍କ ପାଦପଦ୍ମରେ ଭକ୍ତିର ନିବେଦନ ସ୍ଵରୂପ ‘ଗୁହାରି’ ଶୀର୍ଷକ ଏକ ଅନନ୍ୟ ଭକ୍ତିସଙ୍ଗୀତ କାର୍ଯ୍ୟକ୍ରମର ଆୟୋଜନ କରିଆସୁଅଛି । ଶ୍ରୀଗୁଣ୍ଡିଚା ରଥଯାତ୍ରା ଓ ପବିତ୍ର ବାହୁଡ଼ା ଯାତ୍ରାର ମଧ୍ୟବର୍ତ୍ତୀ ସମୟରେ କ୍ରମାଗତ ତିନିଦିନ ଧରି ଆୟୋଜିତ ଏହି କାର୍ଯ୍ୟକ୍ରମ ଭକ୍ତି, ସଙ୍ଗୀତ ଓ ଆଧ୍ୟାତ୍ମିକ ଚେତନାର ଏକ ଅପୂର୍ବ ସମନ୍ଵୟ ଭାବେ ଏହା ପରିଗଣିତ ।
ମହାପ୍ରଭୁ ଶ୍ରୀଜଗନ୍ନାଥଙ୍କ ଅନୁଗ୍ରହ ଓ ସାନ୍ନିଧ୍ୟ ଲାଭକରିଥିବା ମହାନ ଭକ୍ତକବି ଓ ସାଧକମାନଙ୍କ ଅମର ସୃଷ୍ଟି – ଭକ୍ତିରସପୂର୍ଣ୍ଣ ଭଜନ, ଜଣାଣ ଓ ପାରମ୍ପରିକ ସଙ୍ଗୀତକୁ ଉଜ୍ଜୀବିତ ରଖିବା, ଏହାର ସଂରକ୍ଷଣ ଓ ଆଗାମୀ ପିଢ଼ିଙ୍କ ନିକଟରେ ପହଞ୍ଚାଇବା ହିଁ ‘ଗୁହାରି’ କାର୍ଯ୍ୟକ୍ରମର ମୂଳ ଅଭିପ୍ରାଯ । ଏହି ପବିତ୍ର ପ୍ରୟାସ ମାଧ୍ୟମରେ ଶ୍ରୀଜଗନ୍ନାଥ ସଂସ୍କୃତିର ଅମୂଲ୍ୟ ସଙ୍ଗୀତ ପରମ୍ପରାକୁ ଚିରସ୍ଥାୟୀ ରଖିବା ପାଇଁ ‘ଗୁରୁ କେଳୁଚରଣ ମହାପାତ୍ର ଓଡ଼ିଶୀ ଗବେଷଣା କେନ୍ଦ୍ର’ ସଦା ପ୍ରତିବଦ୍ଧ ଓ ଏହାର ମୂଳ ଲକ୍ଷ୍ୟ ।
ଉଦ୍ଘାଟନୀ ଉତ୍ସବର ଅତିଥିମାନେ ଥିଲେ ମାନ୍ୟବର ବିଧାୟକ ଏକାମ୍ର-ଭୁବନେଶ୍ୱର ଶ୍ରୀ ବାବୁ ସିଂ, ମାନ୍ୟବର ବିଧାୟକ, କୋରେଇ ଶ୍ରୀ ଆକାଶ ଦାସନାୟକ, ଓଡ଼ିଶୀ ସଙ୍ଗୀତର ଅଗ୍ରଣୀ ଗାୟକ, ସଙ୍ଗୀତଜ୍ଞ ଓ ସଙ୍ଗୀତ ତତ୍ତ୍ୱବିଦ୍ ଗୁରୁ ପ୍ରଫେସର ରାମହରି ଦାସ, ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗର ଶାସନ ସଚିବ ଡ଼କ୍ଟର ବିଜୟ କେତନ ଉପାଧ୍ୟାୟ ଓ ଗୁରୁ କେଳୁଚରଣ ମହାପାତ୍ର ଓଡ଼ିଶୀ ଗବେଷଣା କେନ୍ଦ୍ରର ପ୍ରଶାସନିକ ଅଧିକାରୀ ଶ୍ରୀମତୀ ସୁଚିସ୍ମିତା ମନ୍ତ୍ରୀ ।
ସଂଧ୍ୟାରେ ପ୍ରଥମେ ଓଡ଼ିଶୀ ଗବେଷଣା କେନ୍ଦ୍ରର ଶିଳ୍ପୀମାନେ ବୃନ୍ଦ ଗାୟନରେ ଜଗନ୍ନାଥ ସ୍ୱାମୀ ନୟନ ପଥଗାମି ଭବତୁମେ ପରିବେଷଣ କରିଥିଲେ । ପରେ ପରେ ବିଶିଷ୍ଟ ଗାୟକ ରବିନ୍ଦ୍ର କୁମାର ମହାପାତ୍ର ପରିବେଷଣ କରିଥିଲେ ନିତ୍ୟାନନ୍ଦ ଦାସଙ୍କ ଦ୍ୱାରା ରଚିତ ପତିତ ଜନକୁ ଉଦ୍ଧାରିବା ପାଇଁ ଓ ସଦାନନ୍ଦ ଦ୍ଵିଜଙ୍କ ରଚିତ କାହାକୁ ମୁଁ କରିବଇଁ ସାକ୍ଷୀ । ପରବର୍ତ୍ତୀ ପ୍ରସ୍ତୁତିରେ ଥିଲା ସୁନାମଧନ୍ୟ ଗାୟିକା ମାନସୀ ପାତ୍ରଙ୍କ ଦ୍ୱାରା ସତେ କି ଏ ଜିବ ଯିବ ଓ ଚାଲ ସଖୀ ଆମ୍ଭେ ଦର୍ଶନ କରିବା । ତା ପରେ ପ୍ରଖ୍ୟାତ ଗାୟକ ଜଗବନ୍ଧୁ ମୁଦୁଲି ପରିବେଷଣ କରିଥିଲେ ଜଗବନ୍ଧୁ ପରି ଜଣେ ସାମନ୍ତ ଓ ଚକାନୟନକୁ ପତିତ କେହି । ପରେ ପରେ ଅର୍ଚ୍ଚନା ପାଢୀ ପରିବେଷଣ କରିଥିଲେ ଦୀନବନ୍ଧୁ ଦଇତାରି ଓ ଥକାମନ ଚାଲ ଯିବା । ତାଙ୍କ ପରେ ଲୋପିତା ବେହେରାଙ୍କ ଦ୍ୱାରା ଦିନବାନ୍ଧବ ହେ ଓ ସବୁ ବନ୍ଧନେ ମୋ ଖୋଲି ଦିଅ ପ୍ରଭୁ ପରିବେଷିତ ହୋଇଥିଲା ।
ପରବର୍ତ୍ତୀ ପ୍ରସ୍ତୁତିରେ ଭଗବାନ ଜେନା ପରିବେଷଣ କରିଥିଲେ ଗୁରୁ ଚନ୍ଦନ ଅଧିକାରିଙ୍କ ଦ୍ୱାରା ରଚିତ ନୀଳଚକ୍ରେ ହୋ ଓ ଅତିବଡି ଜଗନ୍ନାଥ ଦାଶଙ୍କ ଦ୍ୱାରା ରଚିତ ନମସ୍ତେ ପ୍ରଭୁ ଜଗନ୍ନାଥ । ଶେଷରେ ବ୍ରଜମୋହନ ପରିବେଷଣ କରିଥିଲେ ଦୀନକୃଷ୍ଣ ଦାସଙ୍କ ରଚିତ କୃପାସିନ୍ଧୁ ବଦନ କରି ଅବଲୋକନ ଓ ବୀରକିଶୋରଙ୍କ ଦ୍ୱାରା ରଚିତ ଭୂଜ ତଳେ ମୋତେ ରଖ । ସେମାନଙ୍କୁ ଯନ୍ତ୍ରାଂଶରେ ସହଯୋଗ କରିଥିଲେ ତବଲାରେ ଗୋବିନ୍ଦ ଚନ୍ଦ୍ର ବେହେରା, ଢୋଲକରେ ପ୍ରମୋଦ କୁମାର ନନ୍ଦ, ବଂଶୀରେ ଏମ୍. ସିମାଦ୍ରୀ, ଅକ୍ଟୋପ୍ୟାଡ଼ରେ ଅନିରୁଦ୍ଧ ଧଳ, କିବୋର୍ଡ଼ରେ ବିଭୁପ୍ରସାଦ ତ୍ରିପାଠୀ ଏବଂ ହାରାମୋନିୟମରେ ବସନ୍ତ ମିଶ୍ର ।
ଶ୍ରୀ ଜଗନ୍ନାଥଙ୍କ ଉପରେ ଆଧାରିତ ଶିଳ୍ପୀମାନଙ୍କର ଭକ୍ତିପୁତ ସଙ୍ଗୀତ ପରିବେଷଣ ବେଶ୍ ଶ୍ରୃତିମଧୁର ଥିଲା ଯାହାକୁ ଦର୍ଶକ ଶେଷ ପର୍ଯ୍ୟନ୍ତ ଉପସ୍ଥିତ ରହି ବେଶ୍ ପ୍ରଶଂସା କରିଥିଲେ । କାର୍ଯ୍ୟକ୍ରମଟିକୁ ସଂଚାଳନ କରିଥିଲେ ଡ଼କ୍ଟର ମୃତ୍ୟୁଞ୍ଜୟ ରଥ ଓ ଶ୍ରୀ ମୋହନ ମାଜିଠିଆ । ଜଗନ୍ନାଥଙ୍କ ଉପରେ ଏହି ପବିତ୍ର ରଥଯାତ୍ର ସମୟରେ ଓଡ଼ିଶା ସରକାରଙ୍କ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ଦ୍ୱାରା ଆୟୋଜିତ ଏହି ଭକ୍ତି ସଙ୍ଗୀତ କାର୍ଯ୍ୟକ୍ରମ ‘ଗୁହାରି’ ଅତ୍ୟନ୍ତ ଉଚ୍ଚାଭିଳାଷ ପଦକ୍ଷେପ । ଏହି ଗୁହାରି ସଙ୍ଗୀତ ଉତ୍ସବର ସିଧା ପ୍ରସାରଣ ଡିଡି-ଭାରତୀ ଚ୍ୟାନେଲରେ ଏବଂ ଗୁରୁ କେଳୁଚରଣ ମହାପାତ୍ର ଓଡ଼ିଶୀ ଗବେଷଣା କେନ୍ଦ୍ରର ୟୁଟ୍ୟୁବ୍ ଚ୍ୟାନେଲରେ କରାଯାଉଅଛି ।
