ଉଦ୍ଘାଟନୀ ସନ୍ଧ୍ୟାରେ ପ୍ରସିଦ୍ଧ କଣ୍ଠଶିଳ୍ପୀ ବିଦୁଷୀ ଶୁଭା ମୁଦଗଲ ଦର୍ଶକମାନଙ୍କୁ ମନ୍ତ୍ରମୁଗ୍ଧ କଲେ
ଭୁବନେଶ୍ୱର(ପ୍ରଶାନ୍ତ ପାଇକରାୟ): ସୃଜନ -ଗୁରୁ କେଳୁଚରଣ ମହାପାତ୍ର ଓଡ଼ିଶୀ ନୃତ୍ୟବାସ ଦ୍ୱାରା ଶ୍ରୀ ଶ୍ରୀ ବିଶ୍ୱବିଦ୍ୟାଳୟ, କଟକର ସହଯୋଗରେ ଆୟୋଜିତ ୩୨ତମ ଗୁରୁ କେଳୁଚରଣ ମହାପାତ୍ର ପୁରସ୍କାର ଉତ୍ସବ ସେପ୍ଟେମ୍ବର ୫ରେ ରବୀନ୍ଦ୍ର ମଣ୍ଡପରେ ବହୁ ଜାକଜମକରେ ଆରମ୍ଭ ହୋଇଛି ।
ସେପ୍ଟେମ୍ବର ୫ – ୯ ପର୍ଯ୍ୟନ୍ତ ପ୍ରତିଦିନ ସନ୍ଧ୍ୟା ୭ଟାରେ ଆୟୋଜିତ ଏହି ପାଞ୍ଚଦିନିଆ ସାଂସ୍କୃତିକ ମହାକୁମ୍ଭରେ ଶାସ୍ତ୍ରୀୟ ସଙ୍ଗୀତ, ନୃତ୍ୟ ଓ ନାଟକର ଅନନ୍ୟ ପ୍ରଦର୍ଶନୀର ଏକ ଚମତ୍କାର ସମାହାର ରହିଛି । ଓଡ଼ିଶାର ସାଂସ୍କୃତିକ କ୍ୟାଲେଣ୍ଡରରେ ଏହି ପ୍ରମୁଖ ଶାସ୍ତ୍ରୀୟ ଆୟୋଜନର ଚଳିତ ବର୍ଷର ସଂସ୍କରଣ ପୂଜ୍ୟ ଗୁରୁ କେଳୁଚରଣ ମହାପାତ୍ରଙ୍କ ଜନ୍ମ ଶତବାର୍ଷିକୀ ବର୍ଷ ପାଳନ ସହ ସମକାଳୀନ ହୋଇଛି । ଉଦ୍ଘାଟନୀ ସନ୍ଧ୍ୟାରେ ପ୍ରସିଦ୍ଧ ହିନ୍ଦୁସ୍ତାନୀ କଣ୍ଠଶିଳ୍ପୀ ଓ ସଙ୍ଗୀତ ଜଗତର ବିଶିଷ୍ଟ ବ୍ୟକ୍ତିତ୍ୱ ବିଦୁଷୀ ଶୁଭା ମୁଦଗଲ ନିଜର ସୁରମୟ ସଙ୍ଗୀତ ଯାତ୍ରାରେ ଭୁବନେଶ୍ୱରର ଦର୍ଶକମାନଙ୍କୁ ମନ୍ତ୍ରମୁଗ୍ଧ କରି ଏକ ଯଥାର୍ଥ ଶୁଭାରମ୍ଭ କରିଥିଲେ ।
କାର୍ଯ୍ୟକ୍ରମଟି ସନ୍ଧ୍ୟା ୭ଟାରେ ଆରମ୍ଭ ହୋଇଥିଲା, ଯେଉଁଥିରେ ସ୍ୱାଗତ ଅଭିଭାଷଣ ଏବଂ ସନ୍ଧ୍ୟାର ସମ୍ମାନନୀୟ ଅତିଥିମାନଙ୍କ ଦ୍ୱାରା ପ୍ରଦୀପ ପ୍ରଜ୍ୱଳନ କରାଯାଇଥିଲା, ସେମାନେ ହେଲେ ବରିଷ୍ଠ ଗାୟକ ଓ ବିଶିଷ୍ଟ ସଙ୍ଗୀତ ବିଶାରଦ ପଣ୍ଡିତ ଅନୁପ ଜଲୋଟା, ଓଡ଼ିଶା ସରକାରଙ୍କ ରାଜସ୍ୱ ପରିଷଦର ପୂର୍ବତନ ସଦସ୍ୟ ଶ୍ରୀ ଅଶୋକ କୁମାର ତ୍ରିପାଠୀ, ଏମ୍.ଜି.ଏମ୍ ମିନେରାଲ୍ସ ଲିମିଟେଡର ମୁଖ୍ୟ ପରିଚାଳନା ନିର୍ଦ୍ଦେଶକ ଶ୍ରୀ ପଙ୍କଜ ଲୋଚନ ମହାନ୍ତି, ଶ୍ରୀ ଶ୍ରୀ ବିଶ୍ଵବିଦ୍ୟାଳୟର ମାନ୍ୟବର କୁଳପତି ପ୍ରଫେସର ତେଜ ପ୍ରତାପ ଓ ସୃଜନର ନିର୍ଦ୍ଦେଶକ ତଥା ଶ୍ରୀ ଶ୍ରୀ ବିଶ୍ଵବିଦ୍ୟାଳୟର କଳା, ଯୋଗାଯୋଗ ଓ ଇଣ୍ଡିକ୍ ଷ୍ଟଡିଜ୍ ବିଭାଗର ଡିନ୍ ଗୁରୁ ରତିକାନ୍ତ ମହାପାତ୍ର ।
ଉଦ୍ଘାଟନୀ ସନ୍ଧ୍ୟାରେ ଶୁଭା ମୁଦଗଲ ସୁନ୍ଦର ଏବଂ ସୁମଧୁର ରାଗ ବାଗେଶ୍ରୀରେ ଦୁଇଟି ରଚନା ସହିତ ତାଙ୍କର ଉପସ୍ଥାପନା ଆରମ୍ଭ କରିଥିଲେ । ପ୍ରଥମଟି ଥିଲା ବିଲମ୍ବିତରେ ଭଗବାନ ଶ୍ରୀକୃଷ୍ଣଙ୍କ ଜନ୍ମ ଉପରେ କେନ୍ଦ୍ରିତ ଏକ ରଚନା ଯାହା ରୂପକ ତାଲରେ ସଂରକ୍ଷିତ ଥିଲା । ତା’ପରେ ସେ ମଧ୍ୟାଳୟରେ ତିନ ତାଲରେ ଏକ ରଚନା ଉପସ୍ଥାପନ କରିଥିଲେ ଯାହା ମଙ୍ଗତ ଚାନ୍ଦ କନହୟୀଙ୍କ ରଚନା କୃଷ୍ଣ ଜନ୍ମାଷ୍ଟମୀର ଭକ୍ତିଭାବ ଏବଂ ରାଗ ବାଗେଶ୍ରୀର ଜଟିଳତାର ଆଭାକୁ ପ୍ରତିଧ୍ୱନିତ କରିଥିଲା । ଭାରତର ଜଣେ ପ୍ରମୁଖ ଶାସ୍ତ୍ରୀୟ କଣ୍ଠଶିଳ୍ପୀ ଭାବରେ ବହୁଳ ଭାବରେ ସ୍ୱୀକୃତିପ୍ରାପ୍ତ, ସେ ତା’ପରେ ରାଗ ଗୌର ମଲହାରରେ ଏକ ସୁନ୍ଦର ଏବଂ ଆତ୍ମାପୂର୍ଣ୍ଣ ରଚନା ପରିବେଷଣ କରିଥିଲେ, ପରେ ପରେ ସେ ଖୟାଲ, ଥୁମରୀ ଏବଂ ଦାଦରା ପରିବେଷଣ କରି ଦର୍ଶକମାନଙ୍କୁ ମୁଗ୍ଧ କରିଥିଲେ । ତାଙ୍କୁ ତବଲାରେ ଡ. ଅନୀଶ ପ୍ରଧାନ, ହାର୍ମୋନିୟମରେ ଶ୍ରୀ ସୁଧୀର ନାୟକ ଏବଂ ତନପୁରାରେ ସୁଶ୍ରୀ ନୀଲିମା ପ୍ରଧାନ ସହଯୋଗ କରିଥିଲେ । ସନ୍ଧ୍ୟାର ସମସ୍ତ କାର୍ଯ୍ୟକ୍ରମକୁ ସୁବକ୍ତା ଡ.ମୃତ୍ୟୁଞ୍ଜୟ ରଥ ସୁଚାରୁ ଭାବେ ପରିଚାଳନା କରିଥିଲେ ।
ଆଜି ୬/୯ରେ ପ୍ରସ୍ତୁତିରେ ରହିଛି ପଣ୍ଡିତ ତେଜେନ୍ଦ୍ର ନାରାୟଣ ମଜୁମଦାରଙ୍କ ସରୋଦ ବାଦନ ସହ ଶ୍ରୀ ସତ୍ୟଜିତ ତାଲୱାଲକରଙ୍କ ତବଲା ବାଦନ ଏବଂ ଶେଷରେ ଶ୍ରୀମତୀ ଲିପ୍ସା ଶତପଥୀଙ୍କ ଏକକ ଓଡ଼ିଶୀ ନୃତ୍ୟ ପରିବେଷଣ । ଗୁରୁ ରତିକାନ୍ତ ମହାପାତ୍ରଙ୍କ ଦୂରଦୃଷ୍ଟି ଓ ସୂକ୍ଷ୍ମ ନିର୍ଦ୍ଦେଶନାରେ ପରିକଳ୍ପିତ ଏହି ଉତ୍ସବକୁ ପ୍ରତିବର୍ଷ ପରି ଏ ବର୍ଷ ମଧ୍ୟ ଶ୍ରୀ ଦେବୀପ୍ରସାଦ ମିଶ୍ର ଅତି ସୁନ୍ଦର ଭାବରେ ପରିଚାଳନା କରିଛନ୍ତି ।
